फ्रेञ्च स्टार किलियन एमबाप्पेले शुरुवाती गोल गर्दै बे्रस्टबिरुद्ध २–० को जितको आधार खडा गरेपछि पेरिस सेन्ट जर्माइन (पिएसजी) ले लिग वानमा पुन दोहोरो अंकको अग्रता बनाएको छ ।
गत सिजन लिललाई फ्रान्सको शिर्ष श्रेणीको उपाधि सुम्पेको पिएसजीले पछिल्लो पाँच मध्ये चार खेलमा बराबरी गर्दा दोश्रो स्थानको निस ८ अंकको दुरीमा आइसकेको थियो । निसले शुक्रबार नान्टेसलाई २–१ ले हराएको थियो ।
कोरोना संक्रमणबाट रिकभर हुँदै गरेका अर्जेन्टाइन सुपरस्टार लियोनल मेस्सी र चोटग्रस्त नेमारको अनुपस्थितिमा खेले पनि पिएसजीलाई ब्रेस्टले कुनै पनि समय खेलमा चुनौति दिन असफल रह्यो । पहिलो हाफमा नवौं मिनेटमा गोलकिपर जियानलुईजी डोनारुमाले अर्भिन कार्डोनाको प्रहारमा उत्कृष्ट बचाउन गर्नु परे पनि त्यसपछि भने पिएसजीले खेलमा पूर्ण नियन्त्रण लिएको थियो ।
३२ औं मिनेटमा एमबाप्पेले पछिल्लो ६ खेलमा १० औं गोल गर्दै टिमलाई अग्रता दिलाएका थिए । जर्जिन्हो वाइनाल्डमको पास कलेक्ट गर्दै एमबाप्पेले बक्स भित्रबाट सिजनको १९ औं गोल गरे ।
पहिलो हाफ अगाडी माउरो इकार्डीको गोलले मान्यता पाएन भने दोश्रो हाफको शुरुवातमा उनले गोल गर्ने सुनौलो अवसर गुमाएका थिए । ५३ औं मिनेटमा नुनो मेन्डेसको चतुर्याइपूर्ण पासमा जर्मन डिफेन्डर थिलो केह्रेरले लगातार दोश्रो खेलमा दोश्रो गोल गर्दै पिएसजीको जित सुनिश्चित गरेका थिए ।
पिएसजीलाई थप गोल गर्ने अवसर रहेपनि ब्रेस्ट गोलकिपर मार्को बिजोटले निरन्तर उत्कृष्ट बचाउहरु गरेका थिए । खेलको अन्त्यतिर पुर्व रियल म्याड्रिड डिफेन्डर सर्जियो रामोसले पहिलो पटक घरेलु मैदानमा डेब्यु गर्ने अवसर पाएका थिए ।