अन्तिम समयमा भएको बिवादास्पद गोलले आफ्नो टोली अफ्रिका कप अफ नेसन्समा बराबरीमा रोक्किएपछि घाना कप्तान आन्द्रे आयुले ग्याबोनलाई निम्न टोली को संज्ञा दिएका छन् ।
याउन्डेमा भएको समुह सी अन्तर्गतको खेलमा घाना र ग्याबोनले १–१ गोलको बराबरी खेलेका थिए । आयुले गोल गरेपछि खेलकाो १८ औं मिनेटमा नै चार पटकको च्याम्पियन घानाले अग्रता लिएको थियो । आयु अफ्रिका कप अफ नेसन्समा घानाको सर्वाधिक गोलकर्ता हुन् । उनको कुल गोल संख्या १० पुगेको छ भने आसामोवाह् जियानको ८ गोल रहेको छ ।
आफ्नो समुहमा पहिलो जित तर्फ अग्रसर रहेको घाना ८८ औं मिनेटमा स्तब्ध बन्यो ।
जिम एल्भिनाह्लले गोल गरेपछि घानाको नकआउट चरणमा पुग्ने आशामा नराम्रो धक्का लाग्न पुग्यो । लगातार दुई जित हात पार्दै मोरक्को नकआउट चरणमा पुगिसकेको छ भने ग्याबोनको चार अंक रहेको छ । पहिलो खेल हारेको घानाको भने एक अंक मात्रै रहेको छ ।
ग्याबोनको गोलले घाना भने पूर्ण रुपमा असन्तुष्ट रह्यो । आफ्ना मिडफिल्डर ड्यनिएल कोफी केरेह् घाइते भएर लडिरहेको अवस्थामा घानाले बल बाहिर आउट अफ प्ले राखेको थियो । तर ग्याबोनले खेल पुन सञ्चालनमा घानालाई बल नदिएरै बल अगाडी बढाएर गोल गरेको थियो ।
“उनीहरुले एकदम निम्न स्तरको काम गरे । तर सानो टिमहरुले गर्ने काम नै यस्तो हो । हामीले बल आउट अफ प्ले राख्यौं तर फुटबलमा बल फिर्ता दिदै फेयर प्लेको नमुना देखाउने काम गरिन्छ । उनीहरुले त्यो गरेको भए गोल गर्न सक्दैनथे । ग्याबोनलाई खेलमा कुनै मौका नै थिएन,” आयुले भने ।
मोरक्कोले यसअघिको खेलमा कोमोरोसलाई २–० ले पराजित गर्यो । पहिलो खेलमा ग्याबोनसँग पराजित कोमोरोस भने प्रतियोगिताबाट लगभग बाहिरिसकेको छ ।
अन्य खेलमा सेनेगल पनि गिनीसँग बराबरीमा रोक्कियो भने जिम्बाब्वेलाई मलावीले २–१ ले हरायो ।