एर्लिङ्ग हालान्डले दुई गोल गरेपछि बोरुसिया डर्टमण्ड फ्राइबर्गलाई ५–१ को फराकिलो अन्तरले पराजित गर्दै जर्मन बुन्डेसलिगामा बायर्न म्युनिखसँगको दुरी तीन अंकमा छोट्याउन सफल भएको छ ।
लगातार १० औं उपाधि जित्ने अभियानमा रहेको जर्मन महारथी बायर्नको १८ खेलबाट ४३ अंक छ भने एक खेल बढी खेलेको डर्टमण्डको ४० अंक छ । बायर्न आफ्नो १९ औं खेलमा शनिबार कोलोनबिरुद्ध खेल्दैछ ।
गत सिजन बुन्डेललिगा पट्यार लाग्दो हुँदै गइरहेको चर्चा चलिरहेको थियो । त्यो ठिक पनि थियो किनभने हामी बायर्नको स्तर नजिक थिएनौं । यसपटक उनीहरुसँग तीन अंकको दुरीमा छौं । बायर्न यो सिजन पनि उत्कृष्ट खेल्दै गल्तिको मौका नै दिइरहेको छैन । अब हामीले आफ्नो तर्फबाट उत्कृष्ट दिन आवश्यक छ, डर्टमण्डका प्रशिक्षक मार्को रोजले भने ।
म्यानचेस्टर सिटी र रियल म्याड्रिडले इच्छा देखाइरहेको रिपोर्ट बाहिर आउदा आफ्नो कन्ट्रयाक्टमा रिलिज क्लज अब सकृय हुन गइरहँदा हालान्डले डर्टमण्ड छोड्ने चर्चा चल्न भने शुरु भइसकेको छ ।
२१ बर्षिय हालान्डले आफूलाई किन बिश्वको उत्कृष्ट युवा स्ट्राइकर रहेको साबित गर्दै दुवै हाफमा राम्रो फिनिसिँग गर्दै गोल गरेका थिए ।
थोमस मुनिएरले हेडरमार्फत दुई गोल गरेपछि हालन्डको गोलसँगै डर्टमण्डले सिग्नल इडुना पार्कमा पहिलो हाफमा ३–० को फराकिलो अग्रता बनाउन सफल भइसकेको थियो । एर्मेरोडिन डेमिरोभिचले दोश्रो हाफमा एक गोल फर्काए पनि १६ मिनेट बाँकी भएको स्थितिमा हालान्डले आफ्नो दोश्रो गोल गर्दै फ्राइबर्गको लागि पुनरागमनको ढोका बन्द गरिदिएका थिए ।
हालान्डको दुवै गोलमा संलग्नता रहेका महमुद दाहुदले अन्तिम समयमा आफ्नो मिहिनेतको प्रतिफल पाउदै गोल गरेका थिए ।
