अघिल्लो महिना कोरोना संक्रमण भएका अर्जेन्टिनी सुपरस्टार लियोनल मेस्सीले आफू ठिक भइसकेपछि मैदान फर्कनका लागि अझै केही समय चाहिएको बताएका छन् ।
बिदा मनाउनका लागि अर्जेन्टिनामा आफ्नो घर रोजारियो गएका मेस्सीलाई त्यही कोरोना देखिएको थियो भने उनी जनवरी ५ मा पेरिस फर्किएका थिए । सात पटकका किर्तिमानी बालोन डि ओर बिजेताले त्यसपछि सेल्फ आइसोलेसनमा बस्दा पिएसजीका लागि दुई खेल गुमाएका थिए ।
“मलाई ठिक हुनका लागि सोचे भन्दा बढी समय लाग्यो तर अहिले म लगभग ठिक भइसकेको छु र मैदानमा फर्कन पनि चाहन्छु । म शत प्रतिशत हुनका लागि प्रशिक्षण गर्दै आइरहेको छु । यो बर्ष धेरै चुनौतिहरु छन् र आशा गर्छु हामी एक अर्कालाई चाडै देख्नेछौं,” मेस्सीले इन्स्टाग्राममा एक पोस्ट गर्दै भनेका छन् ।
गत साता कोरोना मुक्त भएपछि मेस्सी पिएसजी मुख्यालयमा एक्लदै प्रतिक्षण गर्दै आइरहेका छन् । इएसपिएन अर्जेन्टिनाका अनुसार पुर्व बार्सिलोना फर्वार्ड मेस्सीले यो सप्ताहन्त हुन गइरहेको फ्रेन्च लिग वान अन्तर्गत ब्रेस्ट बिरुद्धको खेल गुमाउने छन् ।
मेस्सीसँगै क्लबका अन्य खेलाडीहरु एन्जेल डि मारिया, जियनलुईजी डोनारुमा र युलियन ड्राक्सलर पनि क्रिष्मस ब्रेकका दौरान कोरोना संक्रमित भएका थिए ।
फेब्रुवरी १५ मा च्याम्पियन्स लिग प्रि–क्वार्टरफाइनलको पहिलो लेगमा पिएसजीले घरेलु मैदानमा रियल म्याड्रिडको सामना गर्नेछ ।