पोखरामा मनाङसँग च्यासल ध्वस्त, व्यहोर्यो लिगमै सबैभन्दा ठूलो हार

अफ्रिकी खेलाडी ओलावाले ओलादिपो अफिजले ह्याट्रिक गरेपछि घरेलु मैदानमा आफ्नो शत प्रतिशत नतिजालाई कायमै राख्दै मनाङ मस्र्याङ्गदी क्लब शहीद स्मारक ए डिभिजन लिगको दोश्रो स्थानमा कायमै रहन सफल भएको छ ।

मनाङले पोखरा रँगशालामा शनिबार भएको खेलमा च्यासल युथ क्लबलाई ५–० को लज्जास्पद हार चखायो । जारी लिगमा यो सबैभन्दा फराकिलो जित हो ।

यसअघि पोखरामा मनाङले नेपाल पुलिस क्लबलाई ३–१ र ब्रिगेड बोइज क्लबलाई १–० ले हराएको थियो ।

जितपछि मनाङ १९ अंक सहित दोश्रो स्थानमा यथावत छ । शनिबार नै दशरथ रँगशलामा भएको खेलमा मच्छिन्द्र फुटबल क्लब फ्रेन्ड्स क्लबबिरुद्ध संघर्षरत जित हात पार्न सफल भएपछि मनाङको लागि आठौं चरणमा शिर्षमा उक्लने मौका गुमिसकेको थियो । मच्छिन्द्रको २० अंक छ ।

हारपछि च्यासलमा पनि रेलिगेसन संकट थप गहिरिएको छ । च्यासल पाँच अंक साथ पछाडीबाट दोश्रो स्थानमा रहेको छ भने फ्रेन्ड्सको तीन अंक छ ।

मनाङलाई जित दिलाउन दुई अफ्रिकी खेलाडीहरुको प्रदर्शन महत्वपूर्ण रह्यो । खेलमा सम्हालिन नपाउदै च्यासल तेश्रो मिनेटमै पछि परेको थियो । ओलावाले ओलादिपो अफिजले निकालेको बलमा च्यासल गोलकिपरसँग वान भर्सेस वानमा एडिलाजा सोमिडेले गोल गरेका थिए ।

पहिलो हाफ सक्किन भन्दा केही मिनेट अगाडी ओलावालेले मनाङको अग्रतालाई दोब्बर बनाए । ८६ औं मिनेटमा दिनेश राजबंशीले कर्नरमा हेडर मार्फत गोल गर्दै मनाङको जितलाई फराकिलो बनाए ।

अन्तिम ६ मिनेटको इन्जुरी समयमा च्यासलले थप दवाबमा खेल्यो । ओलावालेले दुई मिनेटको अन्तरमा दुई गोल गर्दै ह्याट्रिक पुरा गरेका थिए ।