कप्तान डिन एल्गरले संयमित भएर ब्याटिङ गर्दा घरेलु टोली दक्षिण अफ्रिकाले भारत विरुद्धको दोश्रो टेस्टमा सात विकेटको सहज जित हात पारेको छ ।
जितसँगै दक्षिण अफ्रिकाले तीन खेलको शृंखला १-१ को बराबरीमा पुर्याउन सफल भएको छ । सेन्चुरियनमा भएको पहिलो टेस्टमा भारतले दक्षिण अफ्रिकालाई ११३ रनको फराकिलो अन्तरले पराजित गरेको थियो ।
जितका लागि २४० रनको लक्ष्य लिएर ब्याटिङमा आएको दक्षिण अफ्रिकाले ६७ दशमलब चार ओभर खेल्दै तीन विकेटको नोक्सानीमा जित हात पारेको हो । चौथो दिनको खेल दुई विकेटको नोक्सानीमा ११८ रन बाट सुरु गरेको दक्षिण अफ्रिकालाई जितका लागि दुई दिनमा १२२ रन आवश्यक रहेको थियो । तर दक्षिण अफ्रिकाले एक दिन अगावै जित निकाल्न सक्यो ।
दक्षिण अफ्रिकाको जितमा कप्तान एल्गरले अविजित रहँदै सर्वाधिक ९६ रन बनाए । १८८ बलको सामना गरेका उनले १० चौका प्रहार गरे । एल्गर बाहेक दक्षिण अफ्रिकाको जितमा रस्सी भान डर ड़स्सेन ४० तथा टेम्बा बवुमाले अविजित २३ रनको योगदान दिए ।
भारतलाई उसको पहिलो पारीमा मात्र २०२ रनमा रोकेको दक्षिण अफ्रिकाले आफ्नो पहिलो पारीमा २२९ रन बनाउँदै २७ रनको अग्रता लिन सफल भएको थियो । त्यस्तै भारतलाई उसको दोश्रो पारीमा २६६ रनमा समेट्दै २४० रनको लक्ष्य पाएको थियो । भारतको लागि दोश्रो पारीमा अजिंक्य रहानेले सर्वाधिक ५८, चेतेश्वर पुजाराले ५३ तथा शार्दुल ठाकुरले २४ बलमा २८ रनको पारी खेल्दै आउट हुँदा हनुमा बिहारी ४० रनमा अविजित रहे ।
दक्षिण अफ्रिकाका लुंगी एनगिदी, मार्को यानसन र कागिसोरबाडाले समान ३-३ विकेट हात पार्दा दक्षिण अफ्रिकाले मध्यम लक्ष्य पाएको हो ।
दक्षिण अफ्रिकाको तर्फबाट पहिलो पारीमा किगनपिटरसनले सर्वाधिक ६२ र टेम्बा बवुमाले ५१ रन बनाउँदा कप्तान डिन एल्गर २८ तथा काइलवेरेन, मार्को यानसन र केशव महाराज समान २१-२१ रन बनाएर आउट भए भने अन्य ब्याटरले दोहोरो अंकमा रन जोड्न सकेनन् ।
भारतका शार्दुल ठाकुरले १७ दशमलब पाँच ओभर बलिङ गर्दै ६१ रन खर्चिएर सात विकेट हात पार्दा दक्षिण अफ्रिका ७९ दशमलब चार ओभरमा २२९ रन बनाउँदा अल आउट हुन पुग्यो र मात्र २७ रनको अग्रता लिन सक्यो ।
पहिलो पारीमा बिराट कोहलीको अनुपस्थितिमा भारतको कप्तानी सम्हालेका ओपनर केएल राहुलले सर्वाधिक ५० रन बनाए । भारतलाई पहिलो पारीमा सस्तैमा रोक्ने क्रममा मार्को यानसनले १७ ओभरमा ३१ रन खर्चिएर सर्वाधिक चार विकेट लिए भने कागिसोरबाडा र डुएनओलिभरले समान ३-३ विकेट आफ्नो नाममा लेखाए ।