होबार्टहरिकेन्सले बिग ब्यास लिग अन्तर्गत आफ्नो नबौं खेलमा एडिलेडस्ट्राइकर्ससँग सात विकेटको फराकिलो हारको सामना गरे पनि नेपाली राष्ट्रिय क्रिकेट टोलीका लेग स्पिनर सन्दिप लामिछानेले भने उत्कृष्ट प्रदर्शन गरेका छन् ।
यस अघिका खेलमा महँगो साबित भएका सन्दिपले आजको खेलमा चार ओभर बलिङ गर्दै २२ रन खर्चिएर सर्वाधिक दुई विकेट हात पारे । एडिलेडको तीन विकेट खस्दा सन्दिप एक्लैले दुई विकेट लिन सफल भएका हुन् ।
होबार्टको लागि पाँचौं ओभर लिएर आएका सन्दिपले मात्र दुई रन खर्चिएर एक विकेट हात पारे । उनले आफ्नो पहिलो ओभरको तेश्रो बलमा हेनरी हन्टको विकेट लिएका हुन् । सुरुवाती चार बलमा एक विकेट निकाल्दै कुनै पनि रन नदिएका सन्दिपले अन्तिम दुई बलमा भने सिंगल खर्चिए ।
आफ्नो दोश्रो ओभरमा चार सिंगल दिएका सन्दिपले तेश्रो ओभरमा भने आठ रन खर्चिए । त्यस्तै उनले आफ्नो अन्तिम ओभरमा पनि आठ रन खर्चिए पनि एक विकेट हात पारे । आफ्नो चौथो तथा अन्तिम ओभरको पहिलो बलमा म्याट रेन्शको विकेट निकाले पनि अन्तिम बलमा एक चौका खाए ।
जारी बिग ब्यास लिगमा सन्दिपले नौ खेल खेल्दा मात्र ८ विकेट हात पारेका छन् ।
होबार्टले १९ दशमलब पाँच ओभरमा आफ्ना सबै विकेट गुमाएर १२६ रन मात्र जोड्न सक्यो भने एडिलेडले १५ दशमलब एक ओभर खेल्दै तीन विकेट गुमाएर लक्ष्य पार गर्यो ।