सर्बियन टेनिस सुपरस्टार नोभाक जोकोभिचलाई भ्याक्सिन नलगाए पनि अष्ट्रेलियन ओपन खेल्न दिने निर्णयको व्यापक बिरोध भएपछि अष्ट्रेलियाका प्रधानमन्त्रीले नै सार्वजनिक रुपमा स्पष्टिकरण दिनु पर्ने भएको छ ।
बर्षको पहिलो ग्राण्ड स्ल्यामका लागि जोकोभिच अष्ट्रेलियन आउन लाग्दा आयोजकहरुले सबै खेलाडी तथा पदाधिकारीलाई भ्याक्सिन अनिवार्य गरेको छ तर पर्याप्त प्रमाण दिने हो भने एक स्वतन्त्र बिज्ञहरुको टोलीले यसमा छुट दिन सक्नेछ ।
जोकोभिचले आफूले भ्याक्सिन लगाए अथवा नलगाएको बारे केही नबोले पनि गत बर्ष आफू यसको बिरुद्धमा रहेको अभिव्यक्ति दिएका थिए । जोकोभिच बिना भ्याक्सिन नै अष्ट्रेलियन ओपनमा सहभागि हुन गइरहेको समाचार बाहिर आएपछि अष्ट्रेलियनहरु यो निर्णयको आलोचनामा उत्रिएका छन् ।
प्रधानमन्त्री स्कट मोरिसनले जोकोभिचले भ्याक्सिन नलगाएको कारणबारे पर्याप्त प्रमाण दिन नसक्ने हो भने उनलाई प्लेन चढाएर घर पठाइने बताएका छन् ।
अष्ट्रेलियन ओपन आयोजकले जोकोभिचलाई बिशेष ग्राह्यता नदिएको बताए पनि यो निर्णयले संसारकै कडा लकडाउनमा समय बिताएका अष्ट्रेलियनहरु क्रुद्ध बनेका छन् ।
१६ बर्षमाथिका ९० प्रतिशतभन्दा बढी जनसंख्याले भ्याक्सिन लगाइसकेको भएपनि कति अष्ट्रेलियनहरु हालको अवस्थामा एक राज्यबाट अर्को राज्यमा जान सकिरहेका छैनन् ।
अष्ट्रेलियन ओपन जनवरी १७ बाट शुरु हुँदैछ । जोकोभिचले आफ्नो आगमनसँगै मेडिकल छुट पाएको यथेष्ट प्रमाण पेश गर्नु पर्ने अष्ट्रेलियन प्रधानमन्त्रीले बताएका थिए । “यदि उनको प्रमाण पर्याप्त रहने छैन भने उनलाई बिशेष व्यहार गरिने छैन । नोभाक जोकोभिचको लागि छुट्टै नियम बन्दै बन्दैन,” मोरिसनले भने ।
