न्युजिल्याण्डबिरुद्ध बँगलादेशको टेस्ट क्रिकेट इतिहासकै उत्कृष्ट जित

वल्र्ड टेस्ट च्याम्पियन न्युजिल्याण्डमाथि उसकै घरमा ऐतिहासिक जित हात पार्दै बंगलादेशले टेस्ट क्रिकेट इतिहासकै सबैभन्दा ठूलो मध्येको एक स्तब्धपूर्ण नतिजा निकालेको छ ।

इबादोत हुसैनले करिअरकै उत्कृष्ट प्रदर्शन गरेपछि दोश्रो इनिङ्गसमा १७ रनको झिनो अग्रताका साथ १ सय ४७ रनमा पाँच विकेटको स्थितिबाट अघि खेलेको न्युजिल्याण्ड मात्र २२ रन जोड्दा १ सय ६९ रनमा अल आउट हुन पुग्यो ।

जितका लागि ४१ रनको लक्ष्य बँगलादेशले मात्र दुई विकेटको क्षतिमा हात पार्दै बंगलादेशले कुनै पनि संरचनामा पहिलो पटक न्युजिल्याण्डलाई उसकै घरमा माथ दियो । बँगलादेशको लागि जित किन पनि बिशेष रह्यो भने यो टेस्टमा उ आफ्ना दुई उत्कृष्ट ब्याट्म्यान शकिब अल हसन र तमिम इक्बालको अनुपस्थितिमा खेलिरहेको थियो ।

बँगलादेशका लागि नाज्मुल होसेन सान्टोले १७ रन बनाए भने मोमिनुल हकले १३ रन जोडे । मुस्फिकुर रहिमले बिजयी चौका प्रहार गरे ।

न्युजिल्याण्डको दोश्रो इनिङ्गसमा विल यँगले सर्वाधिक ६९ रन बनाए भने रस टेलरले ४० रन बनाए । दुवै होसेनको शिकार बनेका थिए । न्युजिल्याण्डका पाँच ब्याट्स्म्यानले दोश्रो इनिङ्गसमा खाता खोल्न सकेनन् ।

इबादोतले २१ ओभरमा ४६ रन खर्चदै ६ विकेट लिएका थिए । यस्तै टास्किन अहमदले तीन विकेट लिए । इबादोतले यो टेस्ट अघि करिअरको शुरुवाती १० टेस्टमा मात्र ११ विकेट पाएका थिए ।

पहिलो इनिङ्गसमा न्युजिल्याण्डले डेभन कन्वेको १ सय २२ रनको मद्दतमा ३ सय २८ रन जोडेको थियो । महमुद हसन जोय, सान्टो, कप्तान मोमिनुल हक र लिटन दासको उल्लेखनीय योगदानमा बँगलादेशले ४ सय ५८ रन जोड्दै १ सय ३० रनको अग्रता लिन सफल भएको थियो ।