स्पेनिस ला लिगामा १६ औं स्थानको गेटाफेसँग १–० ले स्तब्ध भएपछि रियल म्याड्रिडका प्रशिक्षक कार्लो एन्सलोट्टीले आफ्नो टोलीले अझै पनि बिदा मनाइरहेको भन्दै खेलाडीमाथि कटाक्ष गरेका छन् ।
तीन महिनामा पहिलो हार व्यहोर्दा उपाधिमा रियललाई पछ्याइरहेका अन्य क्लबलाई ठूलो राहत मिलेको छ । एडर मिलिटाओको सामान्य गल्तिको फाइदा उठाउदै एनेस उनालले घरेलु मैदानमा गेटाफेलाई अपेक्षा नगरिएको जित दिलाएका थिए ।
“हामी एक अतिरिक्त दिन बिदा मनाइरहेको थियौं । यो क्रिष्मस अघि खेल्दै आइरहेको टोली थिएन, खेलाडीहरुमा न प्रतिबद्धता देखियो, न एकाग्रता नै । हामी हारकै हकदार त थिएनौं तर यसले हामीलाई निन्द्राबाट उठाउन भने मद्दत गर्नेछ,” रियल प्रशिक्षक एन्सलोट्टीले खेलपछि भने ।
रियल पराजित हुँदा शिर्ष स्थानको दाबेदारीमा रहेका अन्य टोलीहरुलाई ठूलो राहत मिलेको छ । रियलको २० खेलबाट ४६ अंक भएको छ । यदि दुई खेल कम खेलेको सेभियाले अब दुवै खेल जित्ने हो भने उसले रियलसँगको दुरी दुई अंकमा छोट्याउन सक्छ ।
एक खेल कम खेलेका रियल बेटिसको ३३, डिफेन्डिङ्ग च्याम्पियन एट्लेटिको म्याड्रिडको ३२ र बार्सिलोनाको ३१ अंक छ । रायो भालेकानो र रियल सोसिडाडको समान ३० अंक छ ।
एट्लेटिकोले आइतबार नै भालेकानोलाई २–० ले हराउदै शिर्ष चारमा फर्किएको हो । बेटिस भने सेल्टा भिगोसँग २–० ले पराजित भयो भने सोसिडाडले आलाभेससँग १–१ को बराबरी खेल्यो ।
बार्साको झिनो आशा
आइतबारका परिणामले अन्य टोलीहरुलाई सघाउदै गर्दा बार्सिलोनाले दोश्रो रोजाइको टोलीबाटै मायोर्का माथि १–० को जित निकाल्दै आफ्नो झिनो आशालाई कायमै राखेको छ । रियलभन्दा १५ अंक पछाडी रहेपनि बार्सिलोना शिर्ष चारमै राम्रो उपस्थिति जनाउन सक्नेछ भने परस्पर प्रतिद्वन्दीले पनि केही खेलहरुमा अंक गुमाउने आशामा हुनेछ ।
गत हप्ता कोभिड संक्रमण भएका ८ खेलाडीसँगै अन्य ६ जना चोट अथवा प्रतिबन्धनका कारण बार्सिलोना टोलीमा थिएनन् । लुक डि जोँगले गोल गर्दै बार्सिलोनालाई स्पष्ट तीन अंक दिलाएका थिए ।
शुरुवाती ११ का जोर्डी आलबा, औस्माने डेम्बेले र गाभी कोभिड लाग्ने ८ मध्येका तीन थिए भने सर्जियो बुस्केट्स प्रतिबन्धमा रहेका छन् । यस्तै पेद्री, अन्सु फाती र मेम्फिस डिपे चोटग्रस्त रहेका छन् ।
