आफ्नो अघिल्लो खेलमा उपाधिको अर्को प्रबल दाबेदार मनाङ मस्र्याङ्गदी क्लबमाथि १–० को जित हात पारे पनि मच्छिन्द्र फुटबल क्लबलाई राहतको साँस फेर्ने समय छैन । कारण हो एएफसी कपको स्थान ।
मनाङ अहिले ७ खेलबाट १६ अंक सहित शिर्ष स्थानमा छ । एक खेल कम खेलेको मच्छिन्द्र १४ अंक सहित दोश्रो स्थानमा छ । एन्फाले सातौं चरणका खेलहरुको समाप्तिपछि शिर्ष स्थानमा रहेको टोलीलाई एएफसी कपमा सहभागिता गराउने भएकाले मच्छिन्द्रलाई आइतबारको खेल जित्नै पर्ने दवाब छ ।
आइतबारको एक मात्र खेलमा मच्छिन्द्रले दशरथ रँगशालाको फ्लड लाइट मुनि नेपाल पुलिस क्लबको सामना गर्दैछ । दुवै टोलीको लागि यो खेल उत्तिकै महत्वपूर्ण रहेपनि मच्छिन्द्रलाई बढी छ । बराबरी मात्रैले पनि मच्छिन्द्र एएफसी कप खेल्नबाट बञ्चित हुनेछ ।
मच्छिन्द्र लयमा खेलिरहेको टोली हो । जावलाखेल युथ क्लबलाई तेश्रो चरणमा २–० र चौथोमा हिमालयन शेर्पा क्लबलाई ३–० ले हराएको मच्छिन्द्रले त्यसपछिको दुई खेलमा चाहे अनुरुपकै नतिजा निकालेको थियो ।
पाचौं चरणमा हालसम्म लिगमा अपराजित रहँदै तेश्रो स्थानमा रहेको संकटासँग मच्छिन्द्रले बराबरी खेल्यो । त्यसपछिको खेलमा उसले मनाङ्गलाई हराएको हो । मच्छिन्द्रले अर्को बलियो टोली त्रिभुवन आर्मी फुटबल क्लबबिरुद्ध पनि बराबरी खेलेको थियो ।
पुलिसको प्रदर्शन भने उतारचढाव पूर्ण छ । अंक तालिकाको पहिलो हाफजस्तै प्रतिस्पर्धात्मक रहेको तल्लो हाफमा रहेको पुलिस ६ अंक सहित गोल अन्तरको आधारमा १० औं स्थानमा छ । यस्तोमा पुलिसको लागि तीन अंकले पनि ठूलो महत्व राख्नेछ ।
मात्र एक खेल जितेको पुलिसको लागि पछिल्लो दुई खेल राम्रो जान सकेन । पुलिस मनाङसँग अवे खेलमा ३–१ ले हारेको थियो भने बिभागीय डर्बीमा नेपाल एपिएफसँग बराबरीमा रोक्कियो । अर्को डर्बीमा आर्मीलाई बराबरीमा रोकेपनि हिमालयन शेर्पा क्लबसँग बराबरीमा गरेको थियो ।
पुलिसको एक मात्र जित जावालाखेल युथ क्लबबिरुद्ध रहेको छ ।