डेवनकन्वेले २०२२ को पहिलो दिनमा नै शतक प्रहार गर्दै घरेलु टोली न्युजिल्यान्डले बंगलादेश विरुद्धको पहिलो टेस्टको पहिलो दिन राम्रो सुरुवात गरेको छ ।
खेलमा टस हारेर पहिले ब्याटिङ गरेको न्युजिल्यान्डले दिनको समाप्तिमा ८७ दशमलब तीन ओभर खेल्दै पाँच विकेटको नोक्सानीमा २५८ रन बनाएको छ ।
न्युजिल्यान्डको तर्फबाट कन्वेले सर्वाधिक १२२ रन बनाए । चौथो टेस्ट खेलेका कन्वेले आफ्नो खेल जीवनको दोश्रो शतक प्रहार गर्ने क्रममा २२७ बलको सामना गर्दै १६ चौका र एक छक्का प्रहार गरे । कन्वे बाहेक न्युजिल्यान्डको तर्फबाट विलयोङले ५२, रस टेलर ३१ तथा विकेट किपर ब्याटर टम ब्लनडल ११ रन बनाएर आउट भए भने हेनरी निकोल्स ३२ रनमा अविजित छन् ।
आफ्नो पारीको चौथो ओभरमा नै ओपनिङमा आएका कप्तान टम लाथम एक रनमा आउट भए पनि कन्वेले न्युजिल्यान्डको पारी सम्हाले । उनले दोश्रो विकेटका लागि अर्का ओपनर योङसँग मिलेर १३८ रनको साझेदारी गरे । त्यस्तै तेश्रो विकेटका लागि टेलरसँग ५० रनको साझेदारी गरे ।
बंगलादेशकाशोरिफुल इस्लामले सर्वाधिक दुई तथा इबादतहुसैन र मोनिमुल हकले समान १-१ विकेट आफ्नो नाममा दर्ता गराए ।