ब्रिसबेन विरुद्ध सन्दिपको सामान्य प्रदर्शन 

नेपाली राष्ट्रिय क्रिकेट टोलीका लेग स्पिनर सन्दिप लामिछानेले बिग ब्यास लिग अन्तर्गत होबार्ट हरिकेन्सको ब्रिसबेन हिट विरुद्धको खेलमा सामान्य बलिङ प्रदर्शन गरेका छन् । 

यस अघिको खेलमा मेलबर्न रेनेगेड्स विरुद्ध ३२ रन खर्चिएर तीन विकेट हात पारेका सन्दिपले आजको खेलमा चार ओभरमा ३७ रन खर्चिए भने एक विकेट मात्र आफ्नो नाममा लेखाउन सके । पहिलो तीन ओभरमा मात्र १९ रन दिएका सन्दिपले अन्तिम ओभरमा एक विकेट निकाल्न सफल रहे पनि १८ रन खर्चिन पुगे ।

होबार्टको लागि सातौं ओभर लिएर आएका सन्दिपले आफ्नो पहिलो ओभरमा एक चौका सहित कुल ६ रन खर्चिए । दोश्रो ओभरमा सन्दिपले आठ रन दिए भने उनको तेश्रो ओभरमा ब्रिसबेनका ब्याटरहरुले पाँच सिंगलमा लिन सके ।

तर सन्दिप आफ्नो चौथो तथा अन्तिम ओभरमा भने निकै महँगो साबित हुन पुगे । उनको पहिलो दुई बलमा जेम्स बेजलीले क्रमश छक्का र चौका प्रहार गरे भने तेश्रो बलमा एक सिंगल लिए । पहिलो तीन बलमा ११ रन खर्चिएका सन्दिपले आफ्नो चौथो बलमा ज्याक विल्डरमथको विकेट निकल्स सफल रहे । तर उनको अन्तिम बलमा मार्क स्टेकेटीले छक्का प्रहार गर्दा सन्दिप निकै महँगो साबित हुन पुगे ।

सन्दिपले जारी बिग ब्यास लिगमा खासै राम्रो प्रदर्शन गर्न सकेका छैनन् । उनले आठ खेल खेल्दा मात्र ६ विकेट हात पारेका छन् । तीन खेलमा समान १-१ विकेट हात पारेका सन्दिपले एक खेलमा तीन विकेट लिएका थिए भने बाँकी चार खेलमा विकेट बिहिन मात्र बनेनन् महँगो पनि साबित भए ।