नेपाल क्रिकेट संघले फाल्गुनमा आयोजना हुने ट्वान्टी ट्वान्टी विश्वकप छनोटका लागि बन्द प्रशिक्षणका लागि ३० सदस्यीय टोलीको नाम सार्वजनिक गरेको छ । क्यानले नवनियुक्त मुख्य प्रशिक्षक पुबुदु दासानायकेसँगको सल्लाहमा हालको लागि ३० जनाको नाम सार्वजनिक गरेको छ ।
आज सार्वजनिक भएको नाममा क्यानको कारबाहीमा परेका कप्तान ज्ञानेन्द्र मल्ल, उपकप्तान दिपेन्द्र सिंह ऐरी सहित सोमपाल कामी र कमल सिंह ऐरीलाई पनि ३० सदस्यीय टोलीमा स्थान दिइएको छ । ज्ञानेन्द्रको कप्तानी फिर्ता नभए सम्म चार जना लगायत अन्य खेलाडीले नेपालको लागि नखेल्ने अडान राखेको भए पनि क्यानले उनीहरुको नाम बन्द प्रशिक्षणका लागि समावेश गरेको छ ।
त्यस्तै क्यानले बिक्रम सोब,भिम सार्की, जितेन्द्र मुखिया, राजेश पुलामी मगरलाई पनि टोलीमा स्थान दिँदा सौरभ खनाल पनि ३० जना भित्र पर्न सफल भएका छन् । त्यस्तै क्यानले यु१९ टोलीका युवा अलराउण्डर विवेक यादवलाई पनि समावेश गरेको छ ।
क्यानले आगामी आइतबारबाट काठमाडौँमा नै बन्द प्रशिक्षण सुरु गर्ने तयारी गरेको छ भने सबै खेलाडीलाई शनिबार सम्म काठमाडौँमा उपस्थित हुन भनेको छ ।