ओपनर केएल राहुलले अविजित रहँदै शतक प्रहार गरे पछि घरेलु टोली दक्षिण अफ्रिका विरुद्धको पहिलो टेस्टको पहिलो दिनको खेलमा भारतले कब्जा जमाउन सफल भएको छ ।
सेञ्चुरियनमा टस जितेर पहिले ब्याटिङ गरेको भारतले पहिलो दिनको खेलको समाप्ति ९० ओभर खेल्दै तीन विकेट गुमाएर २७२ रन बनायो ।
सुरुवात देखि नै दक्षिण अफ्रिका विरुद्ध हाबी भएको भारतको तर्फबाट ओपनर तथा उपकप्तान केएल राहुलले अविजित रहँदै १२२ रनको पारी खेले । राहुलको यो सातौं र भारत बहिर पाँचौं टेस्ट शतक हो । २४८ बलको सामना गरेका उनले १७ चौका र एक छक्का प्रहार गरे । दिनको खेलको समाप्तिमा पाँचौं नम्बरमा ब्याटिङ गर्न आएका अजिंक्य रहाने पनि ४० रनमा अविजित छन् । उनीहरुको जोडीले चौथो विकेटका लागि अविजित ७३ रनको साझेदारी गरेका छन् ।
कप्तान बिराट कोहलीको पहिले ब्याटिङ गर्ने निर्णयको फाइदा उठाउँदै ओपनर राहुल र मायंकअगरवालले पहिलो विकेटका लागि ११७ रनको साझेदारी गर्दै भारतलाई निकै राम्रो सुरुवात दिए । १२३ बलको सामना गर्दै ६० रन बनाएका अगरवाल लुंगी एनगिदीको बलमा एलबीडब्लुको शिकार हुन पुगे ।
अगरवालको विकेटको पतन पछि ब्याटिङमा आएका चेतेश्वर पुजारा गोल्डेन डक आउट हुन पुगे पनि राहुलले कप्तान कोहलीसँग मिलेर भारतको पारी सम्हाले । ३५ रनमा आउट भएका कोहलीले तेश्रो विकेटका लागि राहुलसँग मिलेर ८२ रनको साझेदारी गरे ।
दक्षिण अफ्रिकाका एनगिदीले भारतका खसेका सबै विकेट हात पारे भने अन्य बलरहरु विकेट बिहिन रहन पुगे ।