मोहम्मद सलाहले सिजनको २२ औं गोल गर्दा लिभरपुलले इंगलिस प्रिमियर लिगमा न्युकासललाई ३–१ ले पराजित गर्दै म्यानचेस्टर सिटीसँगको दुरी एक अंकमा छोट्याएको छ ।
बुधबार भएको खेलमा कोरोना भाइरसको आशंकामा भर्जिला भान डाइक र फाबिन्हो बिना मैदान उत्रेको लिभरपुल खेलको शुरुवातमै पछि परेको थियो । तर दुई मिनेटको अन्तरमा दुई गोल गर्दै लिभरपुलले उत्कृष्ट पुनरागमन जित निकाल्यो ।
१७ चरणको खेलपछि सिटीको ४१ अंक छ भने लिभरपुलको ४० । एभर्टनसँग १–१ को बराबरी खेलेपछि चेल्सी ३७ अंकसाथ तेश्रो स्थानमा रहन पुग्यो । लेस्टर सिटी र टोटेन्ह्याम हट्स्परबीचको खेल भने स्थगित भएको थियो ।
अंक तालिकामा आर्सनल २९ अंकका साथ चौथो र वेष्ट ह्याम युनाइटेड २८ अंकका साथ पाचौं स्थानमा छ । एक खेल कम खेलेको म्यानचेस्टर युनाइटेड २७ अंकका साथ छैटौं स्थानमा छ ।
एन्फिल्डमा जोन्जो सेल्भीले सातौं मिनेटमा गोल गरेपछि लिभरपुल पछि परेको थियो । डियोगो जोटा र सलाहले त्यसपछि २१ र २५ औं मिनेटमा गोल गरेपछि लिभरपुलले मनौबैज्ञानिक रुपमा खेलमा पकड बनाएको थियो ।
टाउकोमा लागेको चोटका कारण आइज्याक हेडन सिक्स यार्ड बक्समा ढलेपनि जोटाले मार्टिन डुब्राभ्काले बचाएपछि आएको रिबाउण्डमा गोल गरेका थिए । सकारात्मक शुरुवात दिलाएका सेल्भी न्युकासलले दोश्रो गोल खाँदा भने खलनायक बने ।
उनले दिएको गलत ब्याकपासको फाइदा उठाएका सादियो मानेले प्रहार गर्दा डुब्राभ्काले छेकेपनि रिबाउण्डमा सलाहले गोल गरे । सलाहले लगातार १५ खेलमा गोल अथवा असिस्ट गर्ने जेमि भार्डीको किर्तिमानको बराबरी पनि गरे ।
न्युकासल दोश्रो हाफमा सुधारिएको टोलीको रुपमा प्रस्तुत भयो र यस दौरान जेकब मर्फी र सेल्भीले केही राम्रा अवसरहरु पनि गुमाए । तर ट्रेन्ट एलेक्जेन्डर–आर्नोल्डले ८७ औं मिनेटमा गोल गर्दै लिभरपुलको जित सुनिश्चित पारेका थिए ।
