अर्जुन साउद एक पटक फेरि ब्याटबाट चम्किएपछि गण्डकी प्रदेशलाई चार विकेटले पराजित गर्दै सुदुर पश्चिम प्रदेश अण्डर १९ राष्ट्रिय क्रिकेट प्रतियोगिताको फाइनलको दावेदारीमा कायमै रहेको छ ।
सुदुर पश्चिमलाई दोश्रो जितमा प्रदेश २ बिरुद्ध प्रतियोगिताको पहिलो शतक प्रहार गरेका अर्जुन साउदको इनिङ्गस महत्वपूर्ण रह्यो । जितका लागि २ सय ९ रनको सामान्य लक्ष्य पछ्याउने क्रममा सुदुरले ६४ रनमा तीन विकेट गुमाइसकेको थियो ।
तर अर्जुनले दुई अद्र्धशतकीय साझेदारी गरेपछि सुदुर पश्चिमले ४९ दशमलव १ ओभरमा ६ विकेटको जित हात पार्यो ।
अर्जुनले चौथो विकेटका लागि कप्तान खडक बोहोरासँग ५० रनको साझेदारी गरे भने छैटौं विकेटका लागि राहुल भण्डारीसँग निर्णायक ६५ रन जोडेका थिए । अर्जुनले ७९ बलमा ६८ रन बनाउदा ६ चौका र दुई चौका प्रहार गरे ।
राहुलले ४२ बलमा नटआउट ४२ रन बनाउदै चार चौका प्रहार गरे । खडकले ७७ बलमा चार चौका हिर्काउदै ४० रन बनाए । गण्डकीका लागि सुबाष भण्डारीले तीन र सुदिप अर्यालले दुई विकेट लिए । तेश्रो हार व्यहोरेको गण्डकीलाई अब फाइनल यात्रा भने निकै कठिन बनिसकेको छ ।
यसअघि पहिलो ब्याटिँग गर्दै ४९ ओभरमा २ सय ९ रनमा समेटिएको गण्डकीका लागि दिपक डुम्रेले अद्र्धशतक बनाए भने ओपनर उत्सव श्रेष्ठले ५२ बलमा ४० रनको इनिङ्गस खेलेका थिए । उनीहरुले तेश्रो विकेटका लागि ५१ रनको पार्ट्नरसिप गरे ।
उत्सवले ५२ बलमा पाँच चौका र दुई छक्का प्रहार गरे भने डुम्रेले ९९ बलमा ५६ रन बनाउदा ७ चौका हिर्काए । सुबाष भण्डारी (२८), कमल परियार (२०) र सुजन गौतम (१७) ले गण्डकीलाई २ सय रन नघाएका थिए ।
सुदुर पश्चिमका लागि कैलाश ऐरिले तीन विकेट लिए भने आकाश चन्द र गजेन्द्र बोहोराले पनि दुई–दुई विकेट हात पारे ।
