पहिलो खेलमा बलियो लुम्बिनी प्रदेशलाई पराजित गर्दै उत्कृष्ट शुरुवात गरेको कर्णाली प्रदेश अर्को निराशाजनक ब्याटिँग प्रदर्शन गर्दै अण्डर १९ राष्ट्रिय क्रिकेट प्रतियोगिताबाट बाहिरिएको छ ।
मुलपानी क्रिकेट मैदानमा मंगलवार कर्णाली बागमती प्रदेशसँग एक विकेटले पराजित भयो । तर कर्णालीले सानो लक्ष्यमा पनि बागमतीलाई निकै संघर्ष गरायो । पहिलो ब्याटिँगको निम्तो पाएको कर्णाली २७ दशमलव १ ओभरमा ७८ रनमै समेटियो । सानो योगफलमा बागमतीको ८ विकेट लिन सफल भएपनि कर्णाली २० औं ओभरमा पराजित हुन पुग्यो ।
लुम्बिनीलाई हराएपछि कर्णाली लगातार चार खेलमा पराजित हुँदै प्रतियोगिताबाट बाहिरिएको हो । उसको हातमा अझै एक खेल छ । लुम्बिनी ८ अंक सहित शिर्ष स्थानमा छ भने प्रदेश १ को ६ अंक छ ।
तेश्रो जित हात पारेको बागमतीको पनि ६ अंक छ तर उ रनरेटमा भने पछाडी छ । लिगको शिर्ष स्थानमा रहने दुई टोलीले सोझै फाइनल खेल्ने छन् ।
सुदुर पश्चिम प्रदेशसँग ६६ रनमा अल आउट भएको कर्णालीको ब्याटिँग बागमती बिरुद्ध पनि फ्लप भयो । गौतम केसी र बिशाल यादवले घातक बलिँग गर्दा कर्णालीले ३५ रनमै ७ विकेट गुमाइसकेको थियो । रुपक दाहाल (१०) र सन्दिप शाही (१४) ले आठौं विकेटका लागि २४ रन जोडेपछि कर्णालीले ५० रन नघाएको थियो ।
बागमतीका लागि गौतमले ६.१ आोभरमा १० रन खर्चदै चार विकेट लिए भने बिशालले पाँच ओभरमा ११ रन दिएर तीन विकेट लिए । यस्तै क्रिस कार्कीले तीन विकेट लिए
अनुज चुनाराले शुरुवाती चार विकेट लिँदा बागमतीको ब्याटिँग पनि राम्रो हुन सकेन । ४५ रनमै पाँच विकेट गुमाएको बागमतीलाई बिबेक मगरले संयमतापुर्वक ब्याटिँग गर्दै सम्हाल्नु परेको थियो । बिबेक १८ रनमा सुभाष ऐरको बलमा आउट भए ।
क्रिसले दुई छक्का प्रहार गरेपछि बागमती जित नजिक पुगेको थियो । तर क्रिस र बिपुल खनाल एक रनको अन्तरमा आउट हुँदा बागमतीलाई अझै तीन रन चहिएको थियो भने हातमा अन्तिम विकेट मात्र रहेको थियो । गौतमले प्रकाश जैसीको बलमा बिजयी छक्का प्रहार गर्दै बागतीलाई जिताएका थिए ।