न्युजिल्याण्डलाई क्लिन स्विप गर्दै भारतले लियो बिश्वकपको हारको बदला

तेश्रो तथा अन्तिम ट्वान्टी ट्वान्टीमा न्युजिल्याण्डलाई ७३ रनको फराकिलो अन्तरले पराजित गर्दै भारतले ट्वान्टी ट्वान्टी बिश्वकपमा भोगेको पराजयको नमिठो बदला लिएको छ ।

यसअघि नै श्रृंखला आफ्नो पारिसकेको भारतले तीन म्याचको श्रृंखला ३–० ले आफ्नो पक्षमा पार्दै क्लिन स्विप गर्न सफल भयो । भारत न्युजिल्याण्डसँग पराजित भएपछि बिश्वपको सुपर १२ बाट आउट भएको थियो ।

कप्तान रोहित शर्माको अद्र्धशतकसँगै अन्य ब्याट्स्म्यानहरुको उल्लेखनीय प्रदर्शनको मद्दतमा भारतले इडेन गार्डेन्समा ७ विकेटको क्षतिमा १ सय ८४ रनको बिशाल योगफल खडा गर्यो । जवाफमा न्युजिल्याण्ड १७ दशमलव २ ओभरमा १ सय १० रनमै अलआउट भयो ।

भारतबिरुद्ध ट्वान्टी ट्वान्टी अन्तर्राष्ट्रियमा न्युजिल्याण्डको यो अहिलेसम्मकै सानो योगफल हो । यसअघिको सबैभन्दा सानो योगफल २०१६ को बिश्वकपमा १ सय २६ रन थियो । सोही खेलमा भारतले न्युजिल्याण्डबिरुद्ध अहिलेसम्मकै सानो योगफल (७६) रनमा समेटिदा पराजित हुन पुगेको थियो ।

ओपनर मार्टिन गुप्टिलले आक्रमक अद्र्धशतक प्रहार गरेपनि न्युजिल्याण्डले अर्को एण्डमा भने निरन्तर विकेट गुमाउन पुग्यो । ३६ बलमा ५१ रन बनाएका गुप्टिल चार चौका र चार छक्का प्रहार गर्दै लेग स्पिनर युजभेन्द्र चाहलको शिकार बने ।

त्यसअघि बायाँ हाते स्पिन अक्सर पटेलले तीन विकेट लिदै न्युजिल्याण्डलाई ब्याक फुटमा धकेलेका थिए । गुप्टिल बाहेक टिम सिफर्टले न्युजिल्याण्डका लागि १७ रन बनाए । लकी फर्गुसन (१४) दोहोरो अंकमा रन जोड्ने अन्तिम ब्याट्स्म्यान थिए ।

कसिलो बलिंग गरेका अक्सरले तीन ओभरमा मात्र ९ रन खर्चे । हर्षल पटेलले पनि भारतका लागि दुई विकेट लिए ।

यसअघि पहिलो ब्याटिङ्ग गरेको भारतलाई एक पटक फेरि रोहितले आकर्षत शुरुवात दिलाए । उनले पहिलो विकेटका लागि इशान किसनसँग ६९ रन जोडे । किसनले २१ बलमा चार चौकाको मद्दतमा २९ रन बनाए ।

इश सोधीलाई रिटर्न क्याच दिनु अघि रोहितले ३१ बलमा पाँच चौका र तीन छक्काको मद्दतमा ५६ रन बनाए । भारतले सुर्यकुमार यादव (डक) र रिसभ पन्त (चार) लाई सस्तैमा गुमाए पनि श्रेयस ऐयर (२५), भेंकटेश ऐयर (२०), हर्षल पटेल (१८) र दिपक चाहरले पनि ब्याटबाट योगदान दिए ।

चाहरले ८ बलमा दुई चौका र एक छक्का प्रहार गरे । न्युजिल्याण्डका लागि मिचेल स्यान्टनरले सर्वाधिक तीन विकेट लिए ।