नेपालमा सम्पन्न १३ औं दक्षिण एसियाली खेलकुदका स्वर्ण बिजेता तथा नेपाल एपिएफ क्लबका धावक किरण सिंह बोगटीले नेपालगञ्ज म्याराथनको उपाधि जितेका छन् ।
बोगटीले २ घण्टा २९ मिनेट ४१ सेकेन्डमा नेपालगञ्ज म्याराथन पूरा गरे । गतवर्ष एपिएफकै गोपीचन्द्र पार्कीले नेपालगञ्ज म्याराथन २ घण्टा १८ मिनेट ५९ सेकेन्डमा पूरा गरेका थिए ।
बोगटीले नेपाली सेनाका नरेन्द्र रावललाई पछि पार्दै उपाधी जितेका हुन् । दोस्रो भएका रावलले २ घण्टा ३३ मिनेट २८ मिनेटमा म्याराथन पूरा गरेका छन् । एपिएफका सन्तोष विष्टले २ घण्टा ३३ मिनेट ३४ सेकेन्डमा दौड पूरा गर्दै तेस्रो भएका छन् ।
खड्गबहादुर खड्का २ घण्टा ३३ मिनेट ४५ सेकेन्ड, देवराज महतरा २ घण्टा ३९ मिनेट २ सेकेन्ड, प्रताप थामसुहाङ २ घण्टा ५९ मिनेट २५ सेकेन्ड र हिम गिरी ३ घण्टा २ मिनेट ३६ सेकेन्डमा दौड पूरा गर्दै क्रमशः चौथो, पाँचौ, छैठौ र सातौ भएका छन् ।
बोगटीले एक लाख रुपैया पुरस्कार पाए भने रावलले ५० हजार र तृतिय भएका विष्टले २५ हजार हात पारे ।
हाफ म्याराथनमा पनि १३ औं दक्षिण एसियाली खेलकुदकी स्वर्ण बिजेता सन्तोषी श्रेष्ठको दबदबा रह्यो । एपिएफकी पुष्पा भण्डारीलाई पछि पार्दै धादिंगकी श्रेष्ठले हाफ म्याराथनको उपाधी जितेकी हुन् । उनले एक घण्टा १८ मिनेट ४८ सेकेन्डमा दौड पुरा गरिन् ।
५ र १० किलोमिटर दौडिने सन्तोषीले अनुभवका लागि लामो दौड्दा प्रथम भएको प्रतिक्रिया दिइन् । भण्डारीले एक घण्टा १९ मिनेट १८ सेकेन्डमा दौड पूरा गरिन् । हाफ म्याराथनमा विन्दु हमाल तृतिय, सरस्वती बोहरा चौथो, साधना शाही पाँचौ, कल्पना थारु छैठौ र चन्द्रमाया रावत सातौ भएका छन् ।
श्रेष्ठले ५१ हजार रुपैया पाइन् । भण्डारीले २५ हजार र हमालले १५ हजार प्राप्त गरिन् ।
१० किलोमिटर ओपन (पुरुष) मा मुकेश पाल प्रथम, ५ किलोमिटर ओपन (महिला) मा राजपुरा पछाई प्रथम भइन् ।
आयोजक क्रियटिभ ह्याण्डसका अध्यक्ष टीएस ठकुरीले २५ हजार पुरस्कारबाट शुरु गरिएको म्याराथनको राशी बढाएर एक लाख रुपैया पु¥याइएको बताउदै म्याराथनमा समाजका विशिष्ट व्यक्तित्वहरुलाई जोड्ने काम भइरहेको बताए ।