दक्षिण अमेरिकी छनोटमा एक पछि अर्को निराशाजनक प्रदर्शन आएपछि उरुग्वेले किर्तिमानी १५ बर्ष राष्ट्रिय टिम सम्हालेका प्रशिक्षक ओस्कार तबारेजलाई बर्खास्त गरेको छ ।
जम्मा ३४ लाख जनसंख्या रहेको सानो देशलाई २०१० को बिश्वकप सेमिफाइनलसम्म पुर्याउनुका साथै २०११ को कोपा अमेरिकाको उपाधि जिताएका ७४ बर्षिय तबारेजलाई उरुग्वेमा लेजेण्डको रुपमा हेर्ने गरिएको छ । तर अहिले उरुग्वेको बिश्वकप छनोट नै शंकाको घेरामा छ ।
१९३० र १९५० को बिश्वकप जितेको उरुग्वेले जारी दक्षिण अमेरिकी छनोटमा लगातार चार खेलमा पराजय व्यहोरिसकेको छ । उरुग्वेले चार मध्ये तीन हारमा तीन गोल अन्तर रहेको छ ।
“एयुएफको केन्द्रिय समितिले ओस्कार वाशिंगटन तबारेजसँगै अन्य कोचिंग स्टाफलाई बर्खास्त गर्ने निर्णय गरेको छ । यो निकै कठिन निर्णय थियो र यसले तबारेजले उरुग्वेको फुटबलमा गरेको योगदानलाई नजरअन्दाज गर्न खोजेको होइन,” एयुएफले एक प्रेस बिज्ञप्तिमा उल्लेख गरेको छ ।
पछिल्लो चार खेलमा उरुग्वेले ११ गोल खाएको छ भने एक गोल गरेको छ । यस क्रममा उसले दुई पटक अर्जेन्टिना र एक–एक पटक ब्राजिल र बोलिभियासँग पराजय व्यहोरेको छ । शिर्ष चार टोलीमात्र बिश्वकपमा प्रवेश गर्ने दक्षिण अमेरिकी छनोटमा हाल सातौं स्थानमा रहेको छ ।
ब्राजिल र अर्जेन्टिनाले बिश्वकपमा स्थान बनाइसकेका छन् भने तेश्रो स्थानमा रहेको इक्वेडरलाई चार खेलमा मात्र दुई जितको आवश्यकता रहेको छ । उरुग्वेसहित अन्तिम एक स्थानको लागि दाबेदारीमा रहेका पाँच टोलीबीच जम्मा दुई अंकको अन्तर रहेको छ ।
एउटै राष्ट्रिय टोलीका लागि किर्तिमानी २ सय २१ खेल खेलाएका तबारेज पछाडी अर्का लेजेण्डरी प्रशिक्षक योआकिम लु रहेका छन् । उनले जर्मनीलाई १ सय ९८ खेल खेलाएका थिए । १५ बर्ष ८ महिनाको कार्यकाल रहेका तबारेज बिश्व फुटबलमा सबैभन्दा लामो समय एकै टिम सम्हाल्ने प्रशिक्षक हुन् ।
पहिलो पटक १९८८ देखि १९९० सम्म उरुग्वे सम्हालेका तबारेज २००६ मा फेरि राष्ट्रिय टोलीमा फिर्ता बोलाइएका थिए । यसबीच उनले दुई पटक अर्जेन्टिनी क्लब बोका जुनियर्स र एक पटक इटालियन टोली एसि मिलानको बागडोर सम्हालेका थिए ।
