न्युजिल्यान्ड विरुद्धको पहिलो टेस्टमा मध्यक्रमका ब्याट्सम्यान तथा उपकप्तान अजिंक्य रहानेले भारतको कप्तानी गर्ने भएका छन् ।
भारतीय क्रिकेट बोर्डले न्युजिल्यान्ड विरुद्धको दुई टेस्ट शृंखलाका लागि आज टोलीको नाम सार्वजनिक गरेको छ । जस अनुसार भारतीय टोलीका कप्तान विराट कोहलीले पहिलो टेस्ट नखेल्ने भएका छन् । कोहलीको अनुपस्थितिमा रहानेलाई कप्तानीको जिम्मेवारी दिइएको हो । कोहली दोश्रो टेस्टमा फर्कने छन् भने भारतको कप्तानी पनि सम्हाल्ने छन् । कोहलीले न्युजिल्यान्ड विरुद्धको तीन ट्वान्टी ट्वान्टी खेलको शृंखला पनि नखेल्ने भएका छन् ।
त्यस्तै भारतले ट्वान्टी ट्वान्टी कप्तान तथा ओपनर रोहित शर्मालाई पनि टेस्टमा विश्राम दिने भएको छ । रोहित बाहेक विकेट किपर ऋषभ पन्त तथा तीब्र गतिका बलरद्वयजस्प्रितबुम्रा र मोहम्मद शामीले पनि दुबै टेस्ट गुमाउने भएका छन् ।
रोहितको अनुपस्थितिमा ट्वान्टी ट्वान्टीका उपकप्तान केएल राहुलले भारतको लागि ओपनिङ गर्नेछन् । त्यस्तै पहिलो टेस्टमा कोहली नहुने भए पछि मध्यक्रममा श्रेयसऐयरले खेल्ने प्रबल सम्भावना रहेको छ । कोहली नभएको अवस्थामा हनुमा बिहारीले भारतको टेस्ट टोलीमा वापसी गर्ने अपेक्षा गरिएको भए पनि उनले टोलीमा स्थान बनाउन सकेनन् । बिहारीलाई टोलीमा नराख्नुका कारण बारेमा बिसीसीआईले केही खुलासा गरेको छैन ।
पन्तलाई विश्राम दिए पछि स्रिकर भारतलाई टोलीमा समावेश गरिएको छ । उनले प्रथम श्रेणी क्रिकेटमा ७८ खेल खेल्दै चार हजार दुई सय ८३ रन जोडेका छन् जसका कारण भारतीय टोलीमा मौका पाएका हुन् ।
न्युजिल्यान्डले भारत भ्रमणका क्रममा तीन ट्वान्टी ट्वान्टीको शृंखला र दुई टेस्टको शृंखला खेल्ने छ । ट्वान्टी ट्वान्टी शृंखला जयपुरमा नोभेम्बर १७ मा सुरु हुनेछ । त्यस्तै भारत र न्युजिल्यान्ड बीचको पहिलो टेस्ट कानपुरमा नोभेम्बर २५ र दोश्रो टेस्ट डिसेम्बर तीनमा मुम्बईमा आयोजन हुनेछ ।