ट्वान्टी ट्वान्टी बिश्वकप सेमिफाइनलमा अष्ट्रेलियाबिरुद्ध उत्कृष्ट प्रदर्शन गर्दै खेलको सर्वाधिक रनकर्ता बनेका पाकिस्तानी ओपनर मोहम्मद रिजवानले दुई दिन दुबईको आइसीयुमा बिताएर मैदानमा उत्रिएको खुलाशा भएको छ ।
रिजवानले ५२ बलमा ६७ रन बनाएपछि पाकिस्तानले २० ओभरमा चार विकेट गुमाउदै १ सय ७६ रनको चुनौतिपूर्ण योगफल बनाएको थियो । पाकिस्तानले एक समय खेललाई आफ्नो नियन्त्रणमा लिएपनि मार्कस स्टोइनिस र म्याथ्यु वेडले छैटौं विकेटकका लागि ४० बलमा ८१ रनको साझेदारी गरेपछि अष्ट्रेलियाले एक ओभर बाकी रहदै पाकिस्तानलाई स्तब्ध बनाएको थियो ।
तर खेल समाप्त भएपछि पाकिस्तानका ब्याटिङ्ग कोच म्याथ्यु हेडन रिजवानको प्रशंशा नगरि बस्न सकेनन् । “उनी एक योद्धा हुन् । बिश्वकपका दौरान उनले उत्कृष्ट खेले र अद्वितीय साहस देखाउदै शुक्रबार मैदानमा उत्रिए,” पुर्व अष्ट्रेलियन ओपनर हेडनले भने ।
रिजवानले खेलका दौरान चार बिशाल छक्का प्रहार गरेका थिए जसमध्ये तीन तिब्र गतिका बलर जोस हेजलउडबिरुद्ध थियो भने एक लेग स्पिनर एडम जाम्पाबिरुद्ध ।
पाकिस्तानी टिम क्याम्पले खुलाए अनुसार रिजवानलाई छातीमा गम्भिर इन्फेक्सन भएको थियो । उनी मंगलवार बिरामी भएपनि दुबईको हस्पिटलमा लगिएको थियो जहा उनले दुई दिन आईसियु बेडमा बिताएका थिए ।
सेमिफाइनलको दिन बिहिबार बिहान मात्र उनलाई हस्पिटलले डिस्चार्ज गरेको थियो । “उनले आज उत्कृष्ट खेले । मलाई उनलाई केही ठिक छैन की जस्तो पनि लागिरहेको थियो तर जब मैले उनलाई उनको स्वास्थ्यको बारेमा सोधे उनले म खेल्नको लागि तैयार छु भने । उनी टिमको लागि खेल्छन्,” पाकिस्तानी कप्तान बाबर आजमले भने ।
प्रतियोगितामा सर्वाधिक रन बनाउने खेलाडीमा बाबर र रिजवान नै रहेका छन् । बाबरले चार अद्र्धशतक प्रहार गर्दै ६ खेलमा ३ सय ३ रन बनाए भने रिजवानले तीन अद्र्धशतकको मद्दतमा २ सय ८१ रन बनाए ।
दुई पाकिस्तानी खेलाडीलाई उछिन्ने सम्भावनामा अष्ट्रेलियन ओपनर डेभिड वार्नर देखिन्छन् । उनको २ सय ३६ रन रहेको छ ।