आफू फर्मबाट बाहिर नगएको साबित गर्दै ब्राजिलियन स्टार नेमारले दुई गोल गरेपछि पेरिस सेन्ट जर्माईन (पिएसजी) ले फ्रेञ्च लिग वानमा बोर्डोखलाई ३–२ ले पराजित गर्यो ।
नेमारले यो सिजन पिएसजीका लागि जम्मा एक गोल मात्र गरेका थिए जुन सेप्टेम्बरमा पेनाल्टीबाट सम्भव भएको थियो । तर शनिबार उनले ओपन प्लेमै दुई गोल गरेका थिए । दुवैमा असिस्ट अर्का स्टार किलियन एमबाप्पेको रहेको थियो ।
“उनले आज निकै राम्रो खेले । आक्रमक खेलाडीले गोल गर्नु टिमको लागि निकै महत्वपूर्ण कुरा हो,” पिएसजीका प्रशिक्षक मोउरिसियो पोचेटिन्होले भने ।
लियोनल मेस्सी चोटका कारण अनुपस्थित रहेको खेलमा एमबाप्पेले पनि गोल गर्दै सन्तुलित खेलमा दुई स्टारहरुले फरक पारेका थिए ।
२६ औं मिनेटमा एमबाप्पेको पासलाई कलेक्ट गर्दै नेमारले बक्स भित्रबाट दुई डिफेन्डरको बीचबाट सुन्दर प्रहारमा गोल गरे । ४३ औं मिनेटमा एमबाप्पेसँग वान–टु पास खेल्दै वान टचमा लो ड्राइभमार्फत दोश्रो गोल गरे ।
बोर्डोखका डिफेन्डरहरु अगाडी आएको समयमा एमबाप्पेले तेश्रो गोल गरे । ६३ औं मिनेटमा जर्जिन्हो वाइनाल्डमले काउन्टर अट्याकमा अगाडी बढ्दा किपर बेनोट कोस्टिल अगाडी आएपछि नेमारलाई साधारण ट्याप इनका लागि अवसर मिलाएका थिए ।
७४ औं मिनेटमा एल्बर्थ एलिसले बोर्डोखका लागि पहिलो गोल फर्काए । इन्जुरी समयको दोश्रो मिनेटमा एमबाये नियाँगले क्लबको लागि पहिलो गोल गरे तर बराबरीका लागि भने समय निक्लिसकेको थियो ।
पिएसजीले अंक तालिकामा ३४ अंकका साथ अग्रता लिएको छ भने दोश्रो स्थानमा रहेको लेन्सको २४ अअंक छ । निसको २३ र मार्सेलको २२ अंक छ ।
