भारतीय क्रिकेट टोलीका पूर्व ओपनर तथा विस्फोटक ब्याटर विरेन्द्र सहवागले बिराट कोहलीको कप्तानीमा रहेको भारतले युएईमा जारी ट्वान्टी ट्वान्टी विश्वकपको सेमिफाइनलमा स्थान बनाउन नसक्ने धारणा व्यक्त गरेका छन् ।
आफ्नो सामाजिक सञ्जालमा समर्थकहरूसँगको भिडियो अन्तरक्रियाका क्रममा सहवागले पहिलो खेलमा पाकिस्तानसँग १० विकेटले पराजित भएको भारतले आफ्नो दोश्रो खेलमा न्युजिल्यान्डसँग पराजित हुने बित्तिकै सेमिफाइनल यात्रा अन्त्य भएको धारणा राखे ।
आफ्नो पहिलो खेलमा नै पाकिस्तानसँग पराजित भए पनि भारतले विश्वकप जित्न सक्ने सहवागले एउटा समर्थकको प्रश्नमा उत्तर दिँदै भनेका थिए । तर दोश्रो खेलमा पनि हारको सामना गर्दा अब पहिलो चरणबाट नै बाहिरिने सङ्घारमा रहेको जनाए ।
भारतले आफ्नो तेश्रो खेलमा अफगानिस्तान माथि ६६ रनको फराकिलो जित निकालेको थियो भने अब उसले कमजोर स्कटल्याण्ड र नामिबियाको सामना गर्नेछ ।
“भारतले पाकिस्तान र न्युजिल्याण्डसँग निकै खराब खेल खेल्यो । खेलाडीहरूको बडी ल्यांङवेज नै राम्रो थिएन,” सहवागले भने । “भारतले जुन किसिमको खेल अफगानिस्तानसँग खेल्यो त्यस किसिमको खेल अघिल्ला दुई खेलमा खेल्न सकेन । पहिलो दुई खेलमा भारत केहि डराएर खेले जस्तो देखिन्थ्यो भने अफगानिस्तानसँग आफ्नो स्वभाविक खेल खेल्यो ।”
भारतले सेमिफाइनलमा स्थान बनाउने हो भने अबका दुई खेलमा स्कटल्याण्ड र नामिबिया माथि फराकिलो जित मात्र निकालेर पुग्दैन । अफगानिस्तानले न्युजिल्यान्डलाई झिनो अन्तरले पराजित गरेको खण्डमा मात्र भारतको भाग्य चम्किन्छ र उसले सेमिफाइनलमा स्थान सुरक्षित गर्नेछ ।
सहवागले न्युजिल्यान्ड निकै बलियो टोली रहेका र अफगानिस्तानलाई सहजै पराजित गर्ने अनुमान गरे । तर उनले आफूले अफगानिस्तानले न्युजिल्यान्डलाई पराजित गरोस् ता कि भारतले सेमिमा स्थान बनाउन सकोस् भन्ने चाहेको पनि बताए ।
सहवागले भारत सेमिफाइनल पुग्न सकेको खण्डमा भने उसलाई दोश्रो पटक ट्वान्टी ट्वान्टी विश्वकपको उपाधि चुम्नका लागि कुनै पनि टोलीले रोक्न नसक्ने पनि दाबी गरे ।