लेग स्पिनर एडम जाम्पाले घातक बलिङ गर्दै पाँच विकेट तथा कप्तान आरोन फिन्चले आक्रामक पारी खेल्दा अष्ट्रेलियाले बंगलादेश माथि आठ विकेटको सहज जित हात पारेको छ ।
अष्ट्रेलियाको जितसँगै समुह १ मा सेमिफाइनल समीकरण रोमान्चक बनेको छ । समान ४-४ खेल सकिँदा इंग्ल्यान्डले चार वटै खेलमा जित निकाल्दै सेमिफाइनलमा प्रवेश पाइसकेको छ भने अष्ट्रेलिया र दक्षिण अफ्रिका मध्य एक टोलीले सेमिमा स्थान बनाउन सक्ने छ । दुबै टोलीले तीन जित र एक हारको सामना गरेका छन् भने १-१ खेल खेल्न बाँकी रहेको छ ।
अष्ट्रेलियाको वेस्ट इन्डिजसँग र दक्षिण अफ्रिकाको इंग्ल्यान्डसँग अन्तिम खेल बाँकी रहेको छ । दुई मध्य जुन टोलीले उक्त खेलमा जित हात पार्छ उसले सेमिमा स्थान बनाउने छ र हार्ने टोली पहिलो चरणबाट नै बाहिरिने छ । अष्ट्रेलिया र दक्षिण अफ्रिका दुवैले आफ्नो अन्तिम लिग खेलमा जित दर्ता गराएको खण्डमा अथवा हारको सामना गरेको अवस्थामा नेट रनले उनीहरुको भाग्य निर्धारण गर्नेछ ।
जाम्पाले चार ओभरमा १९ रन खर्चिएर पाँच विकेट लिए पछि बंगलादेशले १४ दशमलब छ ओभरमा आफ्ना सबै विकेट गुमाएर ७३ रन मात्र बनाउन सक्यो भने कप्तान आरोन फिन्चले २० बलमा चार छक्का र दुई चौकाको मद्दतमा ४० रन जोड्दा अष्ट्रेलियाले मात्र छ दशमलब दुई ओभरमा दुई विकेट गुमाएर लक्ष्य पार गर्यो ।
अष्ट्रेलियाको जितमा बलिङ तर्फ जाम्पा बाहेक मिचेल स्टार्क र जश हेजलउडले पनि समान २-२ विकेट लिए । त्यस्तै ब्याटिङमा डेविड वार्नरले १८ तथा मिचेल मार्शले पाँच बलमा अविजित १६ रनको पारी खेले ।
बंगलादेशका शमिम होसैनले १९, मोहम्मद नैमले १७ तथा कप्तान महमदउल्लाहले १६ रन बाहेक अन्य कुनै पनि ब्याटरले दोहोरो अंकमा रन जोड्न सकेनन् । उसका चार जना ब्याटरले त रनको खाता सम्म पनि खोल्न भ्याएनन् ।
