चोटका कारण लियोनल मेस्सी अनुपस्थित रहेको च्याम्पियन्स लिग खेलमा फ्रेञ्च महारथी पेरिस सेन्ट जमाईन (पिएसजी) जर्मन क्लब आरबी लाइपजिगसँग बुधबार २–२ गोलको बराबरीमा रोक्किएको छ ।
बराबरीसँगै पिएसजीको अन्तिम १६ तर्फको यात्रा केही समयका लागि रोक्किएको छ । चार खेलको समाप्तिपछि समुह ए मा अपराजित पिएसजीको ८ अंक छ भने शिर्ष स्थानमा रहेको म्यानचेस्टर सिटीको ९ अंक छ ।
सिटीले बुधबार नै भएको खेलमा बेल्जियन टोली क्लब बु्रगमाथि ४–१ को फराकिलो जित हात पार्यो । क्लब ब्रुगको चार र बराबरीले बाहिरिएको लाइपजिगको एक अंक मात्र छ । सिटी र पिएसजी दुवैलाई दुई अंकले अन्तिम १६ मा पुर्याउनेछ ।
लाइपजिगमा निर्धारित ९० मिनेट समाप्त भइसक्दा २–१ को अग्रताका साथ खेल आफ्नो पक्षमा पारिसकेको पिएसजी इन्जुरी समयको अन्तिम मिनेटमा रोक्किन पुग्यो । प्रेस्नेल किम्पेम्पेले क्रिष्टोफर एनकुंकुलाई लडाएपछि प्राप्त पेनाल्टीमा डोमिनिक जोबोस्जाईले गोल गर्दै खेललाई बराबरीमा टुंग्याएका थिए ।
एनकुंकुकै गोलमा लाइपजिगले आठौं मिनेटमा अग्रता लिएको थियो । जर्जिन्हो वाइनाल्डमले २१ र ३९ औं मिनेटमा गोल गर्दै पिएसजीलाई खेलको पकडमा राखेका थिए ।
एतिहाद स्टेडियममा सिटीले अर्को बिशाल जित हात पार्यो । फिल फोडेनको गोलबाट १५ मिनेटमा अग्रता लिएको सिटीलाई जोन स्टोन्सको आत्मघाती गोलले झड्का दिएको थियो ।
तर दोश्रो हाफमा रियाद माह्रेज, रहिम स्टर्लिङ्ग र ग्याब्रियल जिजसले गोल गरेपछि सिटीले अन्तिम १६ तर्फ एक कदम चालेको थियो ।
