अर्जेन्टिनी सुपरस्टार लियोनल मेस्सीले अर्को बर्षको बिश्वकपपछि सन्यास लिने कुनै सोच नबनाएको बताउदै खेलाडीको रुपमा करिअर समाप्त गरेपनि बार्सिलोनाको स्पोर्टिङ्ग डिरेक्टरको रुपमा काम गर्ने चाहना रहेको बताएका छन् ।
६ पटकको बालोन डि ओर बिजेता मेस्सी कतारमा अर्को बर्ष बिश्वकप हुँदा ३५ बर्षको हुने छन् । आफ्नो करिअरमा सबै उपाधि जितेका मेस्सीले बिश्वकप मात्र जितेका छैनन् ।
अगष्टमा आफ्नो बाल्यकालदेखिको क्लब बार्सिलोना छोडेपछि मेस्सी जुन २०२३ सम्मका लागि फ्रेञ्च महारथी पेरिस सेन्ट जमाईनसँगको सम्झौतामा बाँधिएका छन् भने त्यसमा एक बष थप्ने बिकल्प पनि रहेको छ ।
एक क्याटलन पत्रिका, स्पोर्ट, लाई दिइएको अन्तर्वार्तामा सन्यास अहिले आफ्नो एजेण्डामा नरहेको उनले बताए ।
“साच्चिकै भने यो कुरा अहिले मेरो दिमागमै आएको छैन । जति कुरा पनि मेरो जीवनमा भएको छ, म दिन प्रति दिन र बर्ष प्रति बर्षको हिसाबले जिउदै आएको छु । बिश्वकपमा र त्यसपछि के हुन्छ मलाई थाहा छैन । तर अहिले म सन्यासको बारेमा सोचिरहेको छैन,” उनले भने ।
झण्डै २० बर्षपछि बार्सिलोना छोड्नु आफ्नो लागि दुखद रहेको बताएपनि उनी एक दिन फर्किएर बार्सिलोनामै बस्ने र क्लबको स्पोर्टिङ्ग डिरेक्टरको रुपमा काम गर्ने इच्छा रहेको चाहना राखे ।
रोनाल्ड कोमन बर्खास्त भएपछि मेस्सीको बार्सिलोनामा लामो समयदेखिका टिममेट जाभी अबको प्रशिक्षक हुने लगभग पक्का रहेको छ । “हामी बार्सिलोनामै बस्नका लागि फर्कने छौं । हाम्रो जीवन त्यही बित्ने छ, यो कुरामा म बिश्वस्त छु । मेरो श्रीमती र त्यही चाहन्छौं,” मेस्सीले भने ।
“मलाई थाहा छैन यो कुरा मेरो पेरिसमा सम्झौता सक्किने बित्तिकै हुनेछ वा अन्य कुनै दिन तर हामी बार्सिलोनामै जीवन बिताउनका लागि फर्कनेछौं । कुनै समय म बार्सिलोनाको स्पोर्टिङ्ग डिरेक्टर हुन चाहन्छु । यो बार्सिलोनामा हुन्छ हुँदैन मलाई थाहा छैन तर म बार्सिलोनालाई नै मद्दत गर्न चाहन्छु ।”
