यो सिजन शिर्ष चारको दाबेदारीमा रहेको रियल बेटिसमाथि ३–० को आकर्षक जित हात पार्दै डिफेन्डिङ्ग च्याम्पियन एट्लेटिको म्याड्रिड स्पेनिस ला लिगाको अंक तालिकामा चौथो स्थानमा उक्लिएको छ ।
वान्डा मेट्रोपोलिटानोमा भएको खेलमा यानिक कारास्कोको दर्शनीय गोलको मद्दतमा एट्लेटिकोले २६ मिनेटमै अग्रता लिएको थियो । दोश्रो हाफमा बेटिसका जर्मन पेज्जेलाले आत्मघाती गोल गरेपछि एट्लेटिकोलाई खेलमा पकड बनाउन अझै सजिलो भएका थिए ।
जाओ फेलिक्सले सब्स्टिच्युटको रुपमा गोल गर्दै एट्लेटिकोलाई महत्वपूर्ण तीन अंक दिलाए । यो सिजन कुनै पनि टोलीले सोचे अनुरुप शुरुवात पाउन नसक्दा एट्लेटिकोले पछिल्लो पाँच खेलमा मात्र दोश्रो खेल जितेको हो ।
अंक तालिकाको शिर्ष स्थानमा भने रियल सोसिडाड रहेको छ । बास्क डर्बीमा एथ्लेटिक बिल्बाओसँग १–१ गोलको बराबरी खेलेपछि सोसिडाडले शिर्ष स्थानमा मात्र एक अंकको अग्रता बनाएको हो ।
सोसिडाडको १२ खेलमा २५ अंक भएको छ भने एक खेल कम खेलेका रियल म्याड्रिड र सेभियाको समान २४ अंक छ । एट्लेटिकोको २२ र १२ खेलबाट बेटिसको २१ अंक रहेको छ । बार्सिलोना ११ खेलबाट १६ अंक सहित नवौं स्थानमा छ ।
आइतबार बेटिस र सोसिडाडले भने अंक तालिकामा नियन्त्रण बनाउन सक्ने अवसर गुमाएका थिए । जितले सोसिडाडले स्पष्ट तीन अंकको अग्रता बनाउने थियो भने बेटिस रियल र सेभियासँगै समान अंकमा रहने थियो ।
