बार्सिलोनाका अर्जेन्टिनी स्ट्राइकर सर्जियो अगुएरोलाई साँस फेर्न समस्या भएपछि आलाभेसबिरुद्धको स्पेनिस ला लिगा खेल दौरान नै हस्पिटल पुर्याइएको छ ।
यो सिजन उदेक लाग्दो शुरुवात गरेको बार्सिलोनाले शनिबार आलाभेससँग १–१ को बराबरी खेलेको थियो । क्याम्प नोउमा ३३ बर्षिय अगुएरो ४१ औं मिनेटमा छाती समात्दै मैदानबाट बाहिरिएका थिए । उनलाई के कारण समस्या भएको स्पष्ट थिएन ।
मैदानमा केही समय प्राथमिक उपचार पाएका अगुएरोका लागि शुरुवातमा स्ट्रेचर ल्याइए पनि उनी उठेरै बाहिर निक्लिएका थिए ।
“छाँतीमा अप्ठेरो भएको बताएपछि सर्जियो अगुएरोलाई कार्डियाक परिक्षणका लागि हस्पिटलमा भर्ना गरिएको छ,” खेलपछि बार्सिलोनाले औपचारिक रुपमा जानकारी दिएको थियो । “मैले उनलाई सोध्दा आफूलाई केही रिँगटा लागेको जस्तो महसुस भएको बताएका थिए । मलाई उनलाई हस्पिटल लगियो भनियो यो बाहेक अरु केही पनि थाहा छैन,” बार्सिलोनाका अन्तरिम प्रशिक्षक सर्जि बरुवानले भने ।
खेलमा मेम्फिस डिपेले ४९ औं मिनेटमा बार्सिलोनालाई अग्रता दिलाए पनि तीन मिनेटपछि नै लुईस रायोजाले गोल गर्दै खेललाई बराबरीमा पुर्याएका थिए । बार्सिलोना अझै पनि ला लिगामा नवौं स्थानमा छ ।
एल्चेमाथि २–१ को जित हात पारेको रियल म्याड्रिड २४ अंक सहित शिर्ष स्थानमा कायमै छ । ११ खेलको समाप्तिपछि रियल, सेभिया र रियल सोसिडाडको समान २४ अंक छ । यसअघिको खेलमा रायो भालेकानोसँग पनि हारेको बार्साको १६ अंक छ ।
रियल बेटिसको २१, भालेकानो, डिफेन्डिङ्ग च्याम्पियन एट्लेटिको म्याड्रिड र ओसासुनाको १९ अंक छ । एट्लेटिकोले एक खेल कम र ओसासुनाले एक खेल बढी खेलेको छ ।
