पछिल्लो समान निकै खराब फर्मबाट गुज्रिएका ओपनर डेविड वार्नरले अर्धशतक प्रहार गरे पछि अष्ट्रेलियाले युएईमा जारी ट्वान्टी ट्वान्टी विश्वकपमा लगातार दोश्रो जित दर्ता गराएको छ । आफ्नो दोश्रो खेलमा अष्ट्रेलियाले श्रीलंका माथि सात विकेटको सहज जित हात पारेको हो ।
वार्नरले ४२ बल खेल्दै १० चौकाको मद्दतमा सर्वाधिक ६५ रन जोड्दा श्रीलंकाले दिएको १५५ रनको लक्ष्य अष्ट्रेलियाले तीन विकेट गुमाएर १९ बल अगावै लक्ष्य पार गर्यो ।
अष्ट्रेलियाको जितमा वार्नर बाहेक कप्तान आरोन फिंचले ३७ रन बनाए भने स्टिभ स्मिथ र मार्कस स्टोइनिसले पनि अविजित रहँदै क्रमश २८ रन १६ रनको योगदान दिए । वार्नर र फिंचले पहिलो विकेटका लागि छ दशमलब पाँच ओभरमा ७० रन जोड्दै अष्ट्रेलियालाई आक्रामक सुरुवात दिए । म्याक्सवेल पाँच रन बनाएर आउट भए ।
श्रीलंकाका वानिन्दु हसरंगाले सर्वाधिक दुई विकेट लिए भने दासुन शनाकाले पनि आफ्नो नाममा एक विकेट हात पार्न सफल रहे ।
यस अघि खेलमा टस हारेर पहिले ब्याटिङ गरेको श्रीलंकाले पुरै २० ओभर खेल्दै ६ विकेटको नोक्सानीमा १५४ रनको सामान्य योगफल मात्र बनाउन सक्यो ।
श्रीलंकाको तर्फबाट कुशल परेरा र चरिथ असलंकाले क्रमश २५ र २७ बलको सामना गर्दै समान ३५-३५ रनको पारी खेले भने भानुका राजापक्षाले पनि अविजित रहँदै २६ बलमा ३३ रनको योगदान दिए । तिनै जनाले समान ४-४ चौका र १-१ छक्का प्रहार गरे ।
तेश्रो ओभरमा नै सात रन बनाएका ओपनर पथुम निसंकालाई गुमाए पनि परेरा र असलंकाले सात दशमलब एक ओभरमा ६३ रनको साझेदारी गर्दै श्रीलंकालाई संकटबाट बचाए । त्यस पछि आएका अभिष्का फर्नान्डो र वानिन्दु हसरंगा समान ४-४ तथा कप्तान दासुन शनाका १२ रन बनाएर पेभेलियन फर्किए ।
एक छोडबाट श्रीलंकाले विकेट गुमाए पनि राजापक्षाले अर्को छोड सम्हाल्दै श्रीलंकालाई सम्मानजनक स्कोर सम्म डोर्याए । श्रीलंकाको तर्फबाट चमिका करुणारत्नेले पनि अविजित नौ रनको पारी खेले ।
श्रीलंकालाई सानो स्कोरमा रोक्ने क्रममा एडम जाम्पा, मिचेल स्टार्क र प्याट कमिन्सले समान २-२ विकेट हात पारे । किफायती बलिङ गरेका जाम्पाले चार ओभरमा मात्र १२ रन खर्चिए भने स्टार्क र कमिन्सले चार ओभरमा नै क्रमश २७ र ३४ रन दिए ।