सन् २०२२ मा आयोजना हुने इन्डियन प्रिमियर लिग (आईपीएल) को लागि पुराना आठ फ्रेन्चाइजले चार जना खेलाडी मात्र रिटेन गर्न पाउने भएको छ ।
आईपीएलले यस अघि मिनी अक्सन आयोजना गर्ने गरेको थियो भने आगामी सिजनमा नयाँ दुई टोली थपिएका कारण नयाँ अक्सन गर्न लागेको हो । त्यसका लागि उसले पुराना आठ टोलीले चार जना खेलाडीलाई मात्र रिटेन गर्न पाउने नियम बनाएको हो । नयाँ फ्रेन्चाइजहरु लखनउ र अहमदाबादले भने अक्सन अघि तीन जना खेलाडी भित्राउन पाउने छ ।
पुराना टोलीले आफ्ना चार खेलाडी मध्य बढीमा तीन स्वदेशी तथा दुई विदेशी खेलाडीलाई रिटेन गर्न पाउने छ । उसले तीन स्वदेशी र एक विदेशी अथवा २-२ स्वदेशी र विदेशी रिटेन गर्ने अधिकार पाएको छ भने नयाँ टोलीको हकमा दुई स्वदेशी र एक विदेशीलाई भित्राउन पाउने छ । स्वदेशी खेलाडीको हकमा भने जुनै पनि समुह, अन्तर्राष्ट्रिय खेलेको अथवा नखेलेकाबाट रिटेन गर्न सक्ने छ ।
यस पटक राइट टु म्याच प्रयोग पनि हुने छैन । राइट टु म्याच नियम अन्तर्गत यदि कुनै टोलीमा भएको खेलाडीलाई अक्सन मार्फत अर्को टोलीले खरिद गर्दछ भने यस विशेष अधिकार प्रयोग गरेर आफ्नै टोलीमा समावेश गर्न पाउने हो ।
सन् २०२२ को अक्सनका लागि खर्च गर्न पाउने रकममा पनि बढोत्तरी गरिएको छ । यस अघि सन् २०२१ को अक्सनमा खर्च गर्न पाउने रकम ८५ करोड भारतीय रुपैयाँ रहेको थियो भने यस पटक पाँच करोड भारतीय रुपैयाँ बढाएर ९० करोड पुर्याइएको छ ।
आईपीएलले अनौपचारिक छलफलमा यस बारेमा सबै टोलीलाई जानकार गराएको छ भने विस्तृत विवरण सार्वजनिक गरेको छैन । त्यस्तै नयाँ फ्रेन्चाइजले अहिलेका आठ फ्रेन्चाइजले रिटेन नगरेका खेलाडी अथवा अक्सनमा समावेश हुने खेलाडी मध्यबाट तीन खेलाडी राख्न पाउने बारेमा पनि खुलस्त पारिएको छैन ।
यस अघि सन् २०१८ मा आयोजना भएको पूर्ण अक्सनमा टोलीले अधिक्तम ८० करोड भारतीय रुपैयाँ खर्च गर्दा ३३ करोड खेलाडी रिटेन गर्नमा खर्च गर्न पाएको थियो । यो पटक यस बारेमा पनि फ्रेन्चाइजहरुलाई पूर्ण विवरण दिइएको छैन ।
बिसीसीआईले यसै हप्ता दुबईमा आयोजना भएको कार्यक्रम मार्फत दुई नयाँ टोलीको छनोट गरेको हो । बिसीसीआईले १२ हजार दुई सय करोड भारतीय रुपैयाँमा दुई नयाँ टोली छनोट गरेको हो । लखनउको लागि सन्जिव गोयन्काको आरपीएसजी ग्रुपले सात हजार करोड भारु तथा अहमदाबादका लागि सिभीसी क्यापिटल्सले ५२ सय करोड भारु खर्च गरेको हो ।