मोहम्मद सलाहले आफ्नो उत्कृष्ट लयलाई कायमै राखेपनि च्याम्पियन्स लिगको निकै नै सनसनीपूर्ण खेलमा लिभरपुलले स्पेनिस च्याम्पियन एट्लेटिको म्याड्रिडलाई ३–२ ले पराजित गरेको छ ।
म्याड्रिडमा भएको नाटकीय खेलमा सलाह र नाबी किटाले पाँच मिनेटको अन्तरमा दुई गोल गर्दै १३ मिनेटभित्रै लिभरपुललाई २–० को अग्रता दिलाएका थिए । एन्टोइन ग्रिजमनले त्यसपछि २० र ३४ औं मिनेटमा गोल गर्दै एट्लेटिकोलाई खेलमा फर्काए ।
फ्रेञ्च फर्वार्ड ग्रिजमन ५२ औं मिनेटमा रोबर्टो फर्मिनोलाई बल खोस्ने क्रममा खुट्टाले मुखमा प्रहार गरेपछि सोझै रेडकार्ड खादै बाहिरिएपछि आक्रमणमा दुवै टोली खतरनाक रहेको खेलमा लिभरपुलले बाजी मार्यो । ७८ औं मिनेटमा मारियो हेर्मोसोले डियोगो जोटालाई लडाएपछि प्राप्त पेनाल्टीमा सलाहले आफ्नो दोश्रो गोल गरे ।
गत सिजन आफ्नो नाम अनुरुप कुनै कमाल गर्न नसकेका सलाहले यो सिजन उत्कृष्ट प्रदर्शन गर्दै आइरहेका छन् । उनले लगातार ९ खेलमा गोल गरेका हुन् ।
युरोपमा लयमा देखिएको लिभरपुलले आफ्नो सबै शुरुवाती तीन खेल जित्दै अंक तालिकामा ९ अंक सहित शिर्ष स्थानमा कब्जा गरेको छ । मात्र एक खेल जितेको एट्लेटिको चार अंक सहित दोश्रो स्थानमा छ । एसि मिलानलाई पराजित गरेको एफसी पोर्टोको पनि चार अंक छ । मिलान अंक बिहिन छ ।
शारिरिक बर्चस्व रहेको खेलमा जित हात पारेपछि लिभरपुल व्यवस्थापक योर्गन क्लोप सन्तुष्ट थिए । “फोहोरी तीन अंक सधै महत्वपूर्ण हुन्छ र आज राति निकै फोहोरी थियो । हामीले उत्कृष्ट फुटबल खेलेका होइनौं तर यो एउटा महत्वपूर्ण कदम हो,” क्लोपले भने ।
च्याम्पियन्स लिगमा लिभरपुलको सर्वाधिक गोलकर्ता बन्ने क्रममा सलाहले ४८ खेलमा ३१ गोल गरिसकेका छन् । उनले क्लब लेजेण्ड स्टेभन जेरार्डको ३० गोलको किर्तिमान तोडेका हुन् ।
