‘सेक्सटेप अफेयर’ नामले चर्चित एक काण्डमा अदालतमा आफ्नो सुनुवाई हुनुभन्दा एक दिन अघि करिम बेन्जेमाले च्याम्पियन्स लिगमा गोल गर्दा रियल म्याड्रिडले युक्रेनी क्लब सख्तर दोनेस्कलाई ५–० को बिशाल अन्तरले हराएको छ ।
सर्ही क्रिभ्सोभले पहिलो हाफमा गरेको आत्मघाती गोलले अग्रता पाएको रियलका लागि ब्राजिलियन भिनिसियस जुनियरले दुई गोल गरेका थिए भने अर्को गोलका लागि रोद्रिगोलाई असिस्ट गरेका थिए । बेन्जेमाले अतिरिक्त समयमा पाचौं गोल गरे ।
फ्रान्सका आफ्ना पुर्व साथी खेलाडी म्याथ्यु भाल्बुवेनालाई ‘सेक्सटेप अफेयर’ काण्डमा ब्ल्याकमेल गरेको आरोपमा बेन्जेमाको बुधबार अन्य चार संलग्न सहितसँग सुनुवाइ हुन गइरहेको छ । बेन्जेमा सुनुवाईमा उपस्थित हुने नहुने स्पष्ट छैन ।
मोल्दोभाको सेरिफ टिरास्पोलसँग घरमै चिप्लिएको रियलका लागि यो पुनरागमन जित थियो । १३ पटकको च्याम्पियन्स लिग बिजेता तीन खेलपछि ६ अंकसहित समुह डी मा सेरिफसँग हेड टु हेडमा दोश्रो स्थानमा रहेको छ ।
शिर्षमा रहेको सेरिफ मँगलवार नै भएको अर्को खेलमा इटालियन टोली इन्टर मिलानसँग २–१ ले पराजित भयो । तीन खेलपछि मिलानको चार अंक छ भने शख्तरको नाममा एक अंक रहेको छ ।
