आयाक्सले मँगलवार जर्मन क्लब बोरुसिया डर्टमण्डलाई ४–० को फराकिलो अन्तरले ध्वस्त पार्दा डच टोलीका आइभोरी कोस्ट खेलाडी सेबास्चियन हालरले पनि एक गोल गरे ।
उक्त गोलबाहेक आयक्सको जितमा उनले महत्वपूर्ण भुमिका पनि खेले । हालरले दिएको असिस्टमा घरेलु फर्वार्ड ड्याली ब्लाइन्ड र ब्राजिलियन विँगर एन्थोनीले १–१ गोल गरे । तीनमा तीन खेल जितेको आयाक्स उच्च लयका साथ समुह सी बाट नकआउट चरण प्रवेश गर्ने दौडमा अग्रपँक्तिमा छ ।
तर चर्चा हालर उनले चाँग लगाएका किर्तिमानको छ । इंगलिस प्रिमियर लिग क्लब वेष्ट ह्यामबाट यसै सिजन आयाक्स आएका हालरले आफ्नो च्याम्पियन्स लिग डेब्युमा ६ गोल गरिसकेका छन् । यसका लागि उनले जम्मा तीन खेल खेलेका छन् र तीन वटै खेलमा गोल गरेका छन् ।
च्याम्पियन्स लिगमा पहिलो तीन वटै खेलमा गोल गर्ने १९ बर्षको किर्तिमानमा उनले पुर्व चेल्सी लेजेण्ड तथा आफ्नै देशका डिडिएर ड्रोग्बाको किर्तिमानको बराबरी गरेका छन् । ड्रोग्बाले २००३ को च्याम्पियन्स लिगमा यो किर्तिमान कायम गरेका हुन् ।
२७ बर्षिय हालरको नाममा अन्य किर्तिमानहरु पनि छन् । पहिलो खेलमा पोर्चुगिज टोली स्पोर्टिङ्ग लिज्बनलाई ५–१ ले हराउदा चार गोल गरेका उनले च्याम्पियन्स लिगको डेब्यु खेलमा चार गोल गर्ने किर्तिमानमा अर्का डच मार्को भान बास्चेनको बराबरी गरेका थिए ।
युरोपको शिर्ष प्रतियोगिताको एकै खेलमा चार वा सो भन्दा बढी गोल गर्ने खेलाडीहरुको सुचीमा लियोनल मेस्सी, क्रिष्चियानो रोनाल्डो, ज्लाटन इब्राहिमोभिच, रोबर्ट लेवान्डोस्की लगायतका खेलाडीहरुको नाम छ । यसमा हालर पनि जोडिएका छन् ।
टर्किस क्लब बेसिक्टासबिरुद्धको दोश्रो खेलमा पनि गोल गर्दै उनी च्याम्पियन्स लिगको पहिलो दुई खेलमा पाँच गोल गर्ने एक मात्र खेलाडी बनेका थिए । उक्त खेलमा गोल गर्दा उनी लगातार दुई च्याम्पियन्स लिग खेलमा गोल गर्ने इतिहासको चौथो खेलाडी बनेका थिए ।
तर हालरले लगातार तेश्रो खेलमा गोल गरेका छन् र अब च्याम्पियन्स लिग इतिहासमा लगातार चार खेलमा गोल गर्ने बिश्वकै एक मात्र फुटबल बन्ने संघारमा छन् ।
