अर्जेन्टिनी स्टार सर्जियो अगुएरोले लामो पर्खाइपछि बार्सिलोनाको लागि डेब्यु गर्दा ब्राजिलियन फिलिपे काउटिन्होले ११ महिनामा क्लबका लागि पहिलो गोल गरेका छन् ।
आइतबार सातौं स्थानमा उक्लने क्रममा यो सिजन खराब शुरुवात गरेको बार्सिलोनाले भ्यालेन्सियालाई ३–१ ले हरायो ।
नयाँ ट्रान्सफर सिजनमा बार्सिलोना भित्रिएका अगुएरो चोटका कारण मैदान बाहिर नै रहेका थिए । काउटिन्होले गोल गर्दै टिमको जित सुनिश्चित गरेपछि अगुएरोलाई तीन मिनेटको खेल मात्र बाकी रहदा मैदानमा उतारिएको थियो ।
अन्सु फाती र मेम्फिस डिपेले गोल गर्दै बार्सिलोनालाई खेलमा अगाडी राखेपछि काउटिन्होले २०२०, नोभेम्बरमा ओसासुनाबिरुद्धको ४–० को जितपछि पहिलो गोल गरेका थिए ।
खेलमा अग्रता भने भ्यालेन्सियाले लिएको थियो । पाचौं मिनेटमै होजे गायाले पाहुना टोलीलाई सरप्राइज लिड दिएका थिए । चोटका कारण झण्डै एक बर्ष बाहिरिएका फातीले बक्स बाहिरबाट सुन्दर गोल गर्दै बराबरी गरेका थिए ।
फातीले नै बक्समा फउल ड्र गर्दै प्राप्त पेनाल्टीमा डिपेले गोल गरेका थिए । बार्सिलोना ८ खेलपछि १५ अंकका साथ सातौं स्थानमा रहेको छ । शिर्ष स्थानको रियल सोसिडाडको ९ खेलबाट २० अंक छ ।
रियल म्याड्रिड, सेभिया, एट्लेटिको म्याड्रिड र ओसासुनाको समान १७ अंक छ । ओसासुनाले आइतबार नै भिलारियाललाई २–१ ले हरायो भने सेभियाले सेल्टा भिगोलाई १–० ले पराजित गर्यो ।
