नेपाली स्टार लेग स्पिनर सन्दिप लामिछाने अन्तर्राष्ट्रिय क्रिकेट काउन्सिल (आईसिसि) को प्लेयर अफ द मन्थ घोषित भएका छन् ।
यो उपलब्धि हात पार्ने सन्दिप अहिलेसम्मका एक्ला नेपाली खेलाडी हुन् । यसअघि ओपनर कुशल भुर्तेल अप्रिल महिनाको लागि यस पुरस्कारको मनोनयनमा परेका थिए । सन्दिप सेप्टेम्बरमा आईसिसि क्रिकेट बिश्वकप लिग टु र पपुवा न्यु गिनी बिरुद्धको दुई म्याचको एकदिवसीय श्रृंखलामा दिएको प्रदर्शनको आधारमा बिजयी भएका हुन् ।
उनले यस दौरान ६ वटा एकदिवसीय अन्तर्राष्ट्रिय खेल्दै ३ दशमलव १७ को इकोनोमीमा १८ विकेट लिएका थिए । चोटका कारण सन्दिपले ओमानबिरुद्धको एक खेलमा भने बलिङ्ग गर्न सकेका थिएनन् ।
उनले पिएनजीबिरुद्धको दोश्रो एकदिवसीयमा करिअरकै उत्कृष्ट प्रदर्शन गर्दै ११ रनमा ६ विकेट लिएका थिए । यस्तै पहिलो एकदिवसीयमा चार विकेट र ओमानबिरुद्ध पनि उनले चार विकेट लिएका थिए । अमेरिकाबिरुद्धको दुवै एकदिवसीयमा सन्दिपले २–२ विकेट लिएका थिए ।
सन्दिपसँगै यस बिधामा बंगलादेशका नसुम अहमद, अमेरिकाका जसकरण मल्होत्रा रहेका थिए । आईसिसिले यसै बर्षदेखि शुरु गरेको यो पुरस्कारको निर्णय भोटिङ्गमार्फत हुनेछ ।
भोटिंगको ९० प्रतिशत पत्रकार, पुर्व खेलाडी, ब्रोडकास्टर र आईसिसि हल अफ फेमका सदस्यहरु रहेको आईसिसि भोटिंग एकेडेमीको हकमा रहने गरेको छ । यसबाहेक समर्थकहरुको भोटले १० प्रतिशत वेटेज पाउने गरेको छ ।
