स्पेनले अन्तर्राष्ट्रिय फुटबलमा इटालीको बिश्व किर्तिमानी अपराजित यात्रामा उसकै घरमा पूर्णबिराम लगाउदै कतार २०२२ बिश्वकप अघि बिश्वसामु नै आफ्नो दरिलो उपस्थिति रहेको सन्देश दिएको छ ।
सान सिरोमा बुधबार भएको खेलमा स्पेनले इटालीमाथि २–१ को जित हात पार्दै युएफा नेसन्स लिगको फाइनलमा स्थान बनायो । मिकेल ओयारजबालले फेराना टोरेसको दुवै गोलमा असिस्ट गरेपछि स्पनेले इटालीको ३७ खेलको अपराजित यात्रामा पूर्णबिराम लगाएको हो ।
स्पेनले अब आइतबार हुने फाइनलमा बेल्जियम अथवा फ्रान्सको सामना गर्नेछ ।
म्यानचेस्टर सिटी फर्वार्ड टोरेसले पहिलो हाफमै स्पेनलाई दुई गोलको अग्रता दिलाएका थिए । त्यसअघि ४२ औं मिनेटमा इटालीका कप्तान लियोनार्डो बोनुच्चीलाई दोहोरो पहेलो कार्डका कारण गुमाइसकेको थियो ।
लोरेन्जो पेलेग्रिनीले ८३ औं मिनेटमा इटालीका लागि एक गोल त फर्काए तर १० खेलाडीमा सिमित घरेलु टोलीका लागि बराबरीका लागि ढिलो भइसकेको थियो । इटालीले सन् १९९९ पछि प्रतिस्पर्धात्मक फुटबलमा पहिलो पटक घरेलु मैदानमा हारको सामना गरेको हो ।
जितसँगै स्पेनले युरो कपमा व्यहोरेको पराजयको बदला पनि लिएको छ । युरो च्याम्पियन इटालीले स्पेनलाई युरोमा टाइब्रेकरमा पराजित गर्दै फाइनलमा स्थान बनाएको थियो ।
स्पेनले क्लब फुटबलमा डेब्यु गरेको डेढ महिना पनि नभएका १७ बर्षिय बार्सिलोना मिडफिल्डर गाभीलाई शुरुवाती ११ मै स्थान दिएको थियो । उनी स्पेनको लागि डेब्यु गर्ने सबैभन्दा कान्छा खेलाडी पनि भएका छन् ।