पोखरा क्वालिफायर नजिक, काठमाडौं बाहिरिने खतरामा

सन्दिप लामिछानेको काठमाडौं किंग्स ११ लाई डकवर्थ लेविस नियममा १४ रनले पराजित गर्दै पोखरा राइनोजले एभरेष्ट प्रिमियर लिगको क्वालिफायरमा एक कदम अगाडी बढाएको छ ।

त्रिवि मैदानमा भएको दोश्रो खेलमा अमित श्रेष्ठ र रायन बर्लको अद्र्धशतकसँगै सन्दिप लामिछानेको धुवाधार ब्याटिङ्गको मद्दतमा काठमाडौंले २० ओभरमा ८ विकेटको क्षतिमा १ सय ८२ रनको बिशाल योगफल खडा गर्यो ।

निकै कमजोर अवस्थामा रहेको पोखरालाई एक पटक फेरि बिबेक यादवले सहान आराचिगेसँग मिल्दै उद्दार गरे । पोखराले १५ ओभरको समाप्तिमा ५ विकेट गुमाउदै १ सय ४२ रन बनाउदा घनघोर बर्षा भएपछि खेल बाकी पाँच ओभरको खेल असम्भव बनेको थियो ।

डकवर्थ लेविस नियममा पोखरा १४ रनले अगाडी रह्यो । पोखरा पाँच वटै खेल समाप्त भइसक्दा ७ अंक सहित दोश्रो स्थानमा रहेको छ । चितवन टाइगर्स ८ अंकका साथ प्लेअफमा प्रवेश गरिसकेको छ ।

क्वालिफायरका लागि अब पोखरा र भैरहवा ग्लेडियेटर्सको मात्र सम्भावना रहेको छ । ६ अंक रहेको भैरहवाले मंगलवार काठमाडौंसँग लिगको अन्तिम खेल खेल्नेछ । जित हात पार्ने हो भने भैरहवा क्वालिफायरमा पुग्नेछ तर हार्ने हो भने पोखरा क्वालिफायरमा पुग्नेछ ।

काठमाडौंका लागि मंगलवारको खेल जित्नै पर्ने बाध्यता छ तर गिलो मैदानका कारण खेल नुहने हो भने उ तीन अंकका साथ एलिमिनेटरमा भैरहवासँगै खेल्नेछ ।

मंगलवार खेल भएर काठमाडौं पराजित हुने हो भने ललितपुर पेट्रियट्स तीन अंकका साथ एलिमिनेटरमा प्रवेश गर्नेछ ।

काठमाडौंका तिब्र गतिका बलरद्वय गुल्सन झा र जितेन्द्र मुखियाले २–२ विकेट लिएपछि पोखराले पहिलो ६ ओभरमा मात्र ३६ रन जोड्दा चार विकेट गुमाइसकेको थियो । त्यसपछि बिबेकले श्रीलंकन सहान अराचिगेसँग ७७ रनको आकर्षक साझेदारी गर्दै खेलमा फर्काएका थिए ।

यो प्रतियोगितामा हालसम्म आउट नभएका बिबेकले २८ बलमा ४१ रन बनाउदै नटआउट रहे । उनले चार चौका र दुई छक्का प्रहार गरे ।

कप्तान सन्दिप लामिछानेले आराचिगेको विकेट लिदै पोखरामाथि थप दवाब बढाए । आराचिगेले २३ बलमा ४३ रन जोड्ने क्रममा चार चौका र तीन छक्का प्रहार गरे । बर्षाले खेल रोकिनु अघि पोखराले छरितो रुपमा रन बटुल्ने कामलाई निरन्तरता दिएको थियो ।

पहिलो दुई विकेट सस्तैमा गुमाएको काठमाडौंलाई सम्हाल्ने क्रममा अमित श्रेष्ठ र रायन बर्लले तेश्रो विकेटको लागि १ सय ४ रनको शान्दार साझेदारी गरेका थिए । प्रतियोगिताको पहिलो अद्र्धशतक बनाउने क्रममा अमितले ४१ बलमा ५६ रन बनाए । उनको नाममा ६ चौका र २ छक्का रह्यो ।

बर्लले ४३ बलमा तीन छक्का र दुई चौकाको मद्दतमा ५० रन जोडे । प्रतियोगितामा यो उनको दोश्रो अद्र्धशतक हो ।

काठमाडौंलाई राम्रो फिनिसिङ्ग दिने काम कप्तान सन्दिप लामिछानेले गरेका थिए । सन्दिपले मात्र ११ बलमा ३१ रन बनाएका थिए । सन्दिपले तीन छक्का र दुई चौका हिर्काए ।

पोखराका लागि बिबेकले अन्तिम ओभरमा ७ रन खर्चदै तीन विकेट लिएका थिए । बिक्रम सोब, नन्दन यादव र साहनले १–१ विकेट लिएका थिए ।