साफ च्याम्पियनसिपमा माल्दिभ्समाथि ऐतिहासिक जित हात पार्दा नेपालका गोल स्कोरर मनिष डाँगीले आफ्नो दिमाग अनुसार नै काम गरेको बताएका छन् ।
शुक्रबार साफ च्याम्पियनसिपको इतिहासमा नेपालले माल्दिभ्समाथि पहिलो जित हात पार्दा मनिषले खेलको ८६ औं मिनेटमा गोल गरेका थिए ।
काउन्टर अट्याकमा गौतम श्रेष्ठले निकालेको पासलाई बिशाल राइले नियन्त्रणमा लिन खोज्दा लडेपछि माल्दिभ्सको मिडफिल्डमा पाएको बललाई ड्रिबल गर्दै मनिषले तीन जना डिफेन्डरलाई छक्काउदै बक्सबाट शान्दार गोल गरेका थिए ।
“बल मेरो ठ्याक्कै अगाडी आउनुमा म भाग्यमानी पनि भए । मैले दिमागमा जे आयो त्यही गरे । पहिलो गोल भएकोले म भावुक पनि भए,” मनिषले खेलपछि भने ।
मनिषको यो दोश्रो अन्तर्राष्ट्रिय गोल हो । उनले यसअघि इराकबिरुद्ध भएको अन्तर्राष्ट्रिय मैत्रीपूर्णमा नेपालको लागि डेब्युमै गोल गरेका थिए ।
त्यो खेलमा शुरुवाती ११ मा खेलेका मनिषलाई धेरै जसो खेलहरुमा प्रशिक्षक अब्दुल्लाह अलमुताइरीले सब्स्टिच्युटको रुपमा प्रयोग गर्दै आइरहेका छन् । शुक्रबार पनि उनले दोश्रो हाफमा नवयुग श्रेष्ठको स्थान लिएका थिए ।
गोलका लागि मनिष अब्दुल्लाह प्रति नै आभारी थिए । “कोचले म माथि धेरै बिश्वास राख्नु भएको छ । उनले मैदान प्रवेश गराउदा पनि मैले गोल गर्न सक्ने आत्मबिश्वास दिनु भएको थियो । र म यसमा सफल पनि भए । आशा गरौं हामी यो प्रतियोगितामा उत्कृष्ट नतिजा निकाल्न सफल हुनेछौं,” उनले थपे ।