अर्जेन्टिनी सुपरस्टार लियोनल मेस्सीले पेरिस सेन्ट जर्माइनका लागि आफ्नो पहिलो गोल गरेपछि फ्रेञ्च महारथीले म्यानचेस्टर सिटीसँग गत सिजन च्याम्पियन्स लिगको सेमिफाइनलमा व्यहोरेको हारको बदला लिएको छ ।
घरेलु मैदानमा पिएसजीले मंगलवार सिटीमाथि २–० को जित हात पार्यो । अगष्टमा पेरिस आए यता मेस्सीले पिएसजीका लागि गोल गर्न सकेका थिएनन् भने घुँडाको सामान्य चोटका कारण पछिल्लो दुई खेलमा बिश्राम समेत लिएका थिए ।
मेस्सीले गरेको गोल उत्कृष्ट त थियो नै सँग–सँगै उनको मौलिक जस्तै देखिन्थ्यो । दायाँबाट बलसँग अघि बढेका मेस्सीले बक्सबाहिर किलियान एमबाप्पेसँग वान टु पास खेल्दै आयमेरिक लपोर्टलाई रोक्दै पहिलो टचमा सुन्दर प्रहारममार्फत गोल गरेका थिए ।
उनको गोलसँगै पेरिसमा दर्शकहरु खुशीले झुमेका थिए । “महत्वपूर्ण भनेको उपाधि दाबेदारमाथि जित हात पार्न सफल हुनु नै हो । म पहिलो गोलका लागि निकै व्यग्र थिए । मैले धेरै खेलेको थिइन र घरेलु मैदानमा पनि जम्मा एक पटक खेलेको थिए । म बिस्तारै टिममा सेटल हुँदैछु,” ७४ औं मिनेटमा पिएसजीको जित सुनिश्चित गरेका मेस्सीले भने ।
पिएसजीका लागि यो सिजनका सम्भवत उत्कृष्ट खेलाडीको रुपमा अघि आएका इद्रिसा गाना गुएले आठौं मिनेटमै गोल गर्दै सिटीलाई खेलमा पछि पारेका थिए ।
दुई गोलको बीचमा सिटीले अधिकांश समय पिएसजीलाई दवाबमा राखेको थियो तर प्रिमियर लिग च्याम्पियनले कुनै पनि समय राम्रो फिनिसिंग पाउन सकेन । रहिम स्टर्लिङ्ग र बर्नार्डाे सिल्भाको प्रहार बारमा लागेर फर्किदा सिटी अभागी साबित भएको थियो । यद्दपि सिटी दोश्रो चरणमा पुग्नका लागि भने पूर्ण रुपमै आशावादी रहनेछ ।
समुए ए मा पिएसजी र बेल्जियमको क्लब ब्रुगको समान चार अंक रहेको छ भने सिटीको तीन अंक छ । पिएसजीलाई आफ्नो घरमा बराबरीमा रोकेको ब्रुगले मंगलवार नै भएको खेलमा जर्मन टोली आरबी लाइपजिगलाई २–१ ले हराएको थियो ।