जितेन्द्र मुखियाको सशक्त बलिंँगसँगै दुई बिदेशी खेलाडीहरुले उत्कृष्ट ब्याटिङ्ग प्रदर्शन गरेपछि काठमाडौं किंग्स ११ ले एभरेष्ट प्रिमियर लिगमा बिजयी शुरुवात गरेको छ ।
त्रिवि क्रिकेट मैदानमा भएको उद्घाटन खेलमा पवन शर्राफको अद्र्धशतकको मद्दतमा ललितपुर प्याट्रियट्सले २० ओभरमा ८ विकेट गुमाउदै १ सय ५७ रनको सम्मानजनक योगफल बनायो ।
अफगानी ओपनर रहमनुल्लाह गुर्बाज र जिब्बाब्वे अलराउण्डर रायन बर्लले बिष्फोटक ब्याटिङ्ग गरेपछि काठमाडौंले १४ दशमलव दुई ओभरमै लक्ष्य प्राप्त गर्यो । ओपनर सुभाष खकुरेल (शुन्य) र अमित श्रेष्ठ (चार) लाई सस्तैमा गुमाउदा काठमाडौंले १२ रनमात्रै जोडेको थियो । तर गुर्बाजले ताबड तोड ब्याटिङ्ग गर्दै बर्लसँग ७६ रनको साझेदारी गरेका थिए ।
२४ बलमै अद्र्धशतक ठोकेका गुर्बाजले ३६ बलमा ५९ रन बनाए । उनले चार चौका र चार छक्का प्रहार गरे । गुर्बाजको विकेट गुमाएपछि बर्लले बिष्फोटक ब्याटिङ्ग थाले । स्पिनर ललित नारायण राजबंशीलाई एकै ओभरमा चार छक्का र एक चौका प्रहार गरेका बर्लले २६ बलमा अद्र्धशतक पुरा गरेका थिए ।
म्यान अफ द म्याच बर्लले चौथो विकेटका लागि राजु रिजालसँग पनि ७२ रनको पार्ट्नरसिप गरे । बर्ललले ३४ बलमै ७७ रन ठोक्दा सात छक्का र तीन चौका प्रहार गरे । राजुले १३ बलमा १९ रन बनाए । उनको नाममा दुई चौका रह्यो ।
दुई ओभरमात्रै बलिङ्ग गरेका ललितले ४८ रन खर्चिएका थिए ।
यसअघि जितेन्द्र मुखियाले सटिक बलिङ्ग गरेपछि ललितपुरले पहिलो तीन विकेट गुमााउदा मात्र ७ रन जोडेको थियो । पवनले त्यसपछि चौथो विकेटका लागि शंकर राणासँग ५६ रनको साझेदारी गर्दै ललितपुरलाई सम्हालेका थिए ।
काठमाडौंका दुई प्रमुख खेलाडी पाकिस्तानी शाहिद अफ्रिदी र सन्दिप लामिछाने दुवैबिरुद्ध आक्रमक ब्याटिङ्ग गरेका पवनले योगेन्द्र सिँह कार्कीसँग अर्को ६३ रनको साझेदारी गर्दै टिमलाई सम्मानजनक योगफलसम्म डोर्याए ।
पवनले ४४ बलमा ६१ रन प्रहार गर्दा पाँच चौका र चार छक्का हिर्काएका थिए । योगेन्द्रले पनि छरितो प्रदर्शन गर्दै २० बलमा ३३ रन जोडे । उनले तीन छक्का प्रहार गरे । भुटानी खेलाडी मिक्यो दोर्जीले आफ्नो क्रिकेट इतिहासको पहिलो फ्रान्चाइज खेलमा १७ रन बनाए भने नारायण जोशीले १२ रन जोडेका थिए ।