रोबर्ट लेवान्डोस्कीले दुई गोल गरेपछि बायर्न म्युनिख च्याम्पियन्स लिगमा बार्सिलोनालाई पराजित गर्दै स्पेनिस महारथी युरोपियन फुटबलमा धेरै पछाडी धकेलिएको प्रमाण राख्न सफल भएको छ ।
अर्जेन्टिनी सुपरस्टार लियोनल मेस्सी लगायत अन्य धेरै खेलाडीहरुले छोडिसकेको बार्सिलोनाका लागि हार किन पनि नराम्रो धक्का रह्यो भने उसले बायर्नसँग क्याम्प नोउमै ३–० को हार व्यहोर्न पुगेको हो । लिरोय सानेले मिलाएको मौकामा थोमस मुलरको गोलबाट अग्रता पाएको बायर्नले खेलमा थप गोल गर्ने मौका पनि गुमाएको थियो ।
लेवान्डोस्कीले एक घण्टा अघि नै दोश्रो गोल गर्दा एक पटक फेरि बार्सालाई गत सिजनको ८–२ को लज्जास्पद हारको झल्को आउने देखिएको थियो । त्यो खेल भन्दा पनि बढी दवाब बायर्नले बार्सामाथि बनाउदा घरेलु टोलीका समर्थक निराश बनेका थिए ।
“यो जे हो त्यही हो । हामी जे छौं त्यो अहिले हाम्रो यथार्थ हो,” बार्सिलोना डिफेण्डर जेरार्ड पिकेले भने । बायर्न प्रशिक्षक युलियन नागेल्समनले आफ्नो टिम अझै राम्रो हुन सक्ने बताएका थिए ।
खेलमा बार्सिलोनाको एक प्रहार पनि अन टार्गेट रहेको थिएन । उसले क्याम्प नोउमा बिरलै देखिने दृश्यमा निकै कम पासहरु खेलेको थियो र बुधबारसम्म आउदा पछिल्ला तीन युरोपियन घरेलु खेलहरुमा १० गोल खाइसकेको छ ।
मुलरले बार्सिलोनाबिरुद्ध ६ खेलमा ७ गोल गरिसकेका छन् भने लेवान्डोस्कीले लगातार १८ औं खेलमा गोल गरेका छन् । नागेल्स्मनले बायर्न सम्हालेयता लगातार छैटौं पटक जित हात पारेका हुन् ।
