रोहित कुमार पौडेलले लगातार अर्को महत्वपूर्ण इनिङ्गस खेलेपछि नेपालले अमेरिकालाई आईसिसि क्रिकेट बिश्वकप लिग टुको दोश्रो त्रिकोणात्मक श्रृंखलामा ५ विकेटले पराजित गर्दै शान्दार शुरुवात गरेको छ ।
मस्क्याटको अल अमिरत क्रिकेट मैदानमा कुशल भुर्तेलको आकर्षक ब्याटिङ्ग र रोहित लगातार दोश्रो एकदिवसीय अन्तर्राष्ट्रि अद्र्धशतक प्रहार गर्ने एक मात्र नेपाली खेलाडी बन्दा नेपालले अमेरिकामाथि लिग टुमा तेश्रो जित हात पारेको हो ।
जितका लागि २ सय ३१ रनको लक्ष्य नेपालले ४९ ओभरमा पांच विकेटको क्षतिमा भेट्टाएको थियो । लिग टु को आफ्नो पहिलो श्रृंखलामा नेपाललले दुवै पटक अमेरिकालाई त्रिवि क्रिकेट मैदानमा हराएको थियो ।
कुशल भुर्तेलको प्रदर्शनसँगै रोहितको इनिङ्गस र बिनोद भण्डारीको फिनिसिँग नेपालको लागि निकै महत्वपूर्ण रह्यो । नेपाल ३४ औं ओ्भरमा १ सय ४५ रन बनाउदा चार विकेट गुमाउदै कमजोर स्थितिमा पुगेको थियो ।
तर रोहित र भण्डारीले पाचौं विकेटका लागि ८३ रनको साझेदारी गरे । यसअघिको खेलमा पपुवा न्यु गिनीबिरुद्ध ८६ रन जोडेका रोहितले अर्को संयमित इनिङ्गस खेल्दै ८७ बलमा नटआउट ६२ रन बनाए । उनले तीन छक्का र दुई चौका प्रहार गरे ।
जितका लागि मात्रै तीन रनको आवश्यकता रहेको स्थितिमा भण्डारी ४८ बलमा ३७ रन बनाउदै आउट भए । उनले दुई चौका र एक छक्का प्रहार गरे ।
कुशल र आशिफ शेखले नेपाललाई चाहे अनुरुपको शुरुवात दिलाउदै पहिलो विकेटका लागि ६६ रनको किर्तिमानी साझेदारी गरे । आशिफले ४२ बलमा २३ रन बनाए ।
सुस्त शुरुवात गरेका उनीहरुले यसअघि कप्तान ज्ञानेन्द्र मल्ल र बिनोद भण्डारीले २०१९ मा युएईबिरुद्ध बनाएको ६१ रनको साझेदारी तोडेका हुन् ।
नेपालले ज्ञानेन्द्र (१७) लाई सस्तैमा गुमाएपनि कुशलले रोहितसँग ५१ रनको अर्को साझेदारी गरे । आफ्नो करिअरको पहिलो शतक नजिक पुगेका कुशल निशर्ग पटेलको एलबिडब्बलु धरापमा परे ।
९४ बलको सामना गरेका कुशलले तीन छक्का र तीन चौकाको मद्दतमा ८४ रनको इनिङ्गस खेले । कुशल मल्ल पनि एक रनमै पेभिलियन फर्किएपछि रोहितले भण्डारीसँग ठोस साझेदारी गर्दै नेपालको जित सुनिश्चित गरेका थिए ।
अमेरिकाले मोनांक पटेलको पहिलो एकदिवसीय अन्तर्राष्ट्रिय शतकको मद्दतमा ५० ओभरमा ९ विकेट गुमाएर २ सय ३० रन बनाएको थियो । पटेल १ सय रनमै आउट भएका थिए ।
नेपालका लागि बिक्रम सोब, सन्दिप लामिछाने र सुशन भारी श्रेष्ठले २–२ विकेट हात पारे ।