सन्दिपको घातक बलिङ्ग सामु पिएनजीले घुँडा टेक्यो, नेपालको एकदिवसीयमा ठूलो जित

लेग स्पिनर सन्दिप लामिछानेले करिअरकै उत्कृष्ट बलिङ्ग प्रदर्शन गरेपछि लिएपछि नेपालले पपुवा न्यु गिनीलाई दोश्रो एकदिवसीय अन्तर्राष्ट्रियमा १ सय ५१ रनको फराकिलो अन्तरले पराजित गर्दै २ म्याचको श्रृंखला क्लिन स्विप गरेको छ ।

रोहित कुमार पौडेलको म्याराथन इनिङ्गस र करण केसीको आक्रमक ब्याटिङ्गपछि नेपालले मस्क्याटमा पहिलो ब्याटिङ्ग गर्दै ४९ दशमलव ३ ओभरमा अल आउट हुदै २ सय ३३ रनको चुनौतिपूर्ण योगफल खडा गरेको थियो ।

तर सन्दिपको घातक बलिंग सामु धराशायी बनेको पिएनजी २० ओभर पनि टिक्न सकेन । पिएनजी १९ दशमलव १ ओभरमा मात्र ८२ रनमा अल आउट भयो । रन अन्तरको आधारमा नेपालको एकदिवसीय अन्तर्राष्ट्रियमा यो अहिलेसम्मकै ठूलो जित हो ।

रन अन्तरको आधारमा नेपालको यसअघिको सबैभन्दा ठूलो जित युएईबिरुद्ध थियो । २०१९ को जनवरीमा नेपालले युएईलाई १ सय ४५ रनले हराएको थियो ।

सन्दिपले ६ दशमलव १ ओभरमा मात्र ११ रन खर्चदै ६ विकेट हात पारे । उनको यसअअघिको उत्कृष्ट प्रदर्शन १६ रनमा ६ विकेट थियो जुन आईसिसि क्रिकेट बिश्वकप लिग टुमा अमेरिकाबिरुद्ध थियो ।

यस्तै बिक्रम सोब, सोमपाल कामी र शुसन भारी श्रेष्ठले पनि १–१ विकेट लिएका थिए । पिएनजीका लागि ओपनर टोनी उराले सर्वाधिक १९ रन बनाए भने चाल्र्स अमिनीले १६ रन जोडेका थिए ।

यसअघि ओपनर कुशल भुर्तेल र आसिफ शेख समान तीन रनमा आउट हुँदा नेपालको जम्मा ९ रन थियो । त्यसपछि रोहित र कप्तान ज्ञानेन्द्र मल्लले नेपाललाई सम्हालेका थिए । रोहितले तेश्रो विकेटका लागि ज्ञानेन्द्रसँग ८९ रनको साझेदारी गरेका थिए ।

यो नेपालको एकदिवसीय इतिहासमा कुनै पनि विकेटका लागि अहिलेसम्मकै ठूलो साझेदारी हो ।

ज्ञानेन्द्रले ७० बलमा ४५ रन बनाए । उनको इनिङ्गसमा तीन चौका र दुई छक्का सामेल थियो । त्यसपछि रोहितले बिनोद भण्डारी (१७) सँग ४१ रन जोडेका थिए ।

कुशल मल्ल (एक) र सोमपाल कामी (११) लामो समय टिक्न नसकेपनि रोहित र करण केसीले ६६ रनको महत्वपूर्ण साझेदारी गरेका थिए । निकै आक्रमक ब्याटिंग गरेका करणले २६ बलमा ४२ रन बनाए । उनको इनिङ्गसमा चार छक्का र दुई चौका रहेको थियो ।

नेपालले दुवै ब्याट्स्म्यानलाई दुई बलको अन्तरमा गुमाएको थियो । उसले अन्तिम चार विकेट मात्र एक रनको अन्तरमा गुमाएको थियो ।

रोहितले १ सय २३ बलमा ८६ रन बनाए । तीन छक्का र दुई चौका प्रहार गरेका रोहित पुर्व कप्तान पारस खड्कापछि सबैभन्दा बढी रन जोड्ने ब्याट्स्म्यान बने । पारसले युएईबिरुद्ध १ सय १५ रन बनाएका थिए ।

पपुवा न्यु गिनीका लागि चाड सोपरले तीन विकेट लिए भने नर्मन भनुवा र काबुवा मोरेआले २–२ विकेट हात पारे ।