दक्षिण अमेरिकी फुटबल इतिहासको सर्वाधिक अन्तर्राष्ट्रिय गोलकर्ता बन्ने क्रममा अर्जेन्टिनी सुपरस्टार लियोनल मेस्सीले २०२२ कतार बिश्वकप छनोट अन्तर्गत बोलिभियाबिरुद्ध ह्याट्रिक गरेका छन् ।
मेस्सीकै उच्च प्रदर्शनको मद्दतमा अर्जेन्टिनाले बोलिभियामाथि ३–० को सहज जित हात पार्यो । मेस्सीले पेलेको ७७ अन्तर्राष्ट्रिय गोलको बराबरी गरेपछि करिअरको ७८ औं र ७९ औं गोल गरे ।
अर्जेन्टिनाका लागि आफ्नो १ सय ५३ औं खेल खेल्ने क्रममा मेस्सीले १४ औं मिनेटमा टिमलाई अग्रता दिलाएका थिए । यस क्रममा उनले एक बोलिभियन डिफेण्डरलाई नटमेग गर्दै उत्कृष्ट रुपमा घुमाउरो शट प्रहार गर्दै गोल गरे ।
लौटारो मार्टिनेजसँग वान टु पास खेल्दै मेस्सीले बक्स भित्रबाट ६४ औं मिनेटमा पेलेको किर्तिमान तोडे । खेल सकिन दुई मिनेट बाकी रहेको स्थितिमा उनले करिअरको ७९ औं गोल गरे ।
अन्तर्राष्ट्रिय फुटबलमा सबैभन्दा बढी गोल पोचुगिज सुपरस्टार क्रिष्चयानो रोनाल्डोको नाममा रहेको छ । रोनाल्डोले १ सय ८० खेलमा १ सय ११ गोल गरेका छन् ।
आइतबार कोरोना भाइरसले उत्पन्न बिवादका कारण ब्राजिलबिरुद्धको खेल स्थगित भएपछि अर्जेन्टिनाले बिहिबार उत्कृष्ट जित हात पारेको हो ।
इंगलिस प्रिमियर लिग खेलिरहेका जियोभानी लो सेल्सो, क्रिष्चियन रोमेरो, एमिलियानो मार्टिनेज र एमिलियानो बुएन्डियाले ब्राजिलमा कोरोनाको गलत कागज दिएर प्रवेश गरेको आरोप अगाडी आएपछि खेल स्थगित भएको थियो ।
चारै जना खेलाडीको बिहिवार भएको खेलमा भने संलग्नता रहेको थिएन ।
दक्षिण अमेरिकी छनोटमा अपराजित अर्जेन्टिना १८ अंक सहित दोश्रो स्थानमा रहेको छ ।
