२०२२ बिश्वकप छनौट अन्तरर्गत लिथुवानीयालाई ५–० को भारी अन्तरले पराजित गर्दै इटालीले अन्तर्राष्ट्रिय फुटबलमा आफ्नो अपराजित यात्रालाई बिश्व किर्तिमानी ३७ खेलसम्म लम्ब्याएको छ ।
यसअघि नै ब्राजिलको ३५ खेलको अपराजित यात्राको किर्तिमान तोडिसकेको युरो कप बिजेता इटालीलाई बुधबार सहज जित दिलाउने क्रममा मोइजे किनले २०१९ पछि आफ्नो पहिलो दुई अन्तर्राष्ट्रिय गोल गरेका थिए ।
यसअघिको खेलमा स्विट्जरल्याण्डसँग बराबरी खेल्दै ३६ खेलमा अपराजित रहेको नयाँ किर्तिमान कायम गरेको इटालीले कमजोर लिथुवानीया बिरुद्ध अपेक्षा अनुसार नै सशक्त प्रदर्शन गर्यो ।
एभर्टनबाट युभेन्टस फर्किएका किनले दुवै गोल पहिलो हाफमै गरेका थिए । एडगरस उट्कुसको आत्मघाती गोल र जियाकाम्पो रास्पाडोरीले पनि गोल गर्दा इटाली पहिलो हाफमै ४–० ले अघि बढ्न सफल भएको थियो ।
प्रमुख खेलाडीहरुलाई बिश्राम दिइएको खेलमा जियोभानी डि लोरेन्जोले पाचौं गोल गरेका थिए । रोबर्टो मान्चिनीको टोलीले दोश्रो स्थानको स्विट्जरल्याण्डसँगको दुरी ६ अंकले लम्ब्याएको छ ।
२०१८ को रुस बिश्वकपमा स्थान बनाउन नसकेको पिडालाई इटाली यस पटक कतारमा खेल्दै भुलाउन चाहिरहेको छ । इटालीले युरो कप जितेपनि उसका समर्थकहरु टोली बिश्वकप छनोटले मात्रै सन्तुष्ट हुनेछन् ।
समुह सी मा स्विट्जरल्याण्डसँग दुई खेल हातमै रहेपनि बेल्फास्टमा नर्दन आयरल्याण्डसँग बराबरीमा रोक्किएपछि उसलाई नराम्रो धक्का लागेको हो । खेलमा ह्यारिस सेफेरोभिचको पेनाल्टीलाई नर्दन आयरल्याण्ड गोलकिपर बेली पिकक–फ्यारेलले बचाएका थिए ।