भारतीय राष्ट्रिय फुटबल टोलीका कप्तान सुनिल क्षेत्रीले नेपाल जस्तो राम्रो या खराब जस्तो सुकै लयमा भएपनि आफ्नो टोलीबिरुद्ध सधै उत्कृष्ट दिने गरेको बताएका छन् ।
नेपाल र भारत दुई मध्येको पहिलो अन्तर्राष्ट्रिय मैत्रीपूर्ण खेलमा बिहिबार खेल्न गइरहेका छन् । खेल दशरथ रंगशालामा सांझ ५ः३० मा हुन गइरहेको छ ।
एक दिन अघि भएको पत्रकार सम्मेलनमा क्षेत्री र भारतीय प्रशिक्षक इगो स्टिम्याकले खेलबारे आफ्नो धारणा राख्दै नेपालीबिरुद्ध खेल्न सहज नहुने बताएका थिए । हेरौं के भने क्षेत्री र स्टिम्याकलेः
भारतीय कप्तान सुनिल क्षेत्री
हामी अगाडी गएर केही महत्वपूर्ण खेलहरु खेल्न गइरहेका छौं र यो दुई वट खेल यो सिजनको लागि राम्रो शुरुवात हुनेछ । नेपाली टोली जस्तो सुकै लयमा भएपनि सधै हामीबिरुद्ध उत्कृष्ट दिने गरेको छ । हामीले यी दुई खेलमा पनि त्यही अपेक्षा गरिरहेका छौं । हामी पनि जस्तो सुकै लयमा भएपनि, नेपाली राष्ट्रिय टोलीसंग खेल्दा हामीलाई सधै गाह्रो हुने गरेको छ ।
पछिल्लो पटक हामीले खेल्दा पनि हामीलाई धेरै गाह्रो भएको थियो । त्यसमाथि अहिले नेपाली टोलीले घरेलु मैदानमा खेल्दैछ र यो हाम्रो लागि निकै कठिन स्थिति हो ।
भारतीय प्रशिक्षक स्टिमाक
हामी निकै स्तरीय र आकर्षक फुटबल खेल्ने प्रयासमा हुनेछौं । हामी यो दुई खेलका लागि दावेदार रहेको तथ्यलाई साबित गर्न चाहन्छौं । धेरै खेलाडीहरुलाई टोलीका लागि खेल्दै आइरहेका छन् र केही महत्वपूर्ण प्रतियोगिताहरु खेलिसकेका कारण मैले उनीहरुबाट के चाहन्छु उनीहरुलाई राम्ररी थाहा छ ।
हामीले यहां आउनु अघि नेपाली टोलीको बारेमा राम्ररी बिश्लेषण गरेका थियौं । नेपाली टोलीले प्रगति गरेको छ । केही महिना अघि सम्पन्न बिश्वकप छनौटमा पनि उनीहरुले राम्रो फुटबल खेल्न सक्ने साबित गरेका छन् ।
रक्षात्मक रुपमा नेपाली टोलीले धरै सुधार ल्याएको छ । युवा खेलाडीहरुलाई मौका दिएर नेपालका प्रशिक्षकले राम्रो काम गरेका छन् ।