कप्तान जो रुटले शतक प्रहार गरे पछि घरेलु टोली इंग्ल्यान्डले भारत विरुद्धको तेश्रो टेस्टको दोश्रो दिन रनको विशाल अग्रता लिन सफल भएको छ ।
भारतलाई उसको पहिलो पारीमा मात्र ७८ रनमा समेटेको इंग्ल्यान्डले दोश्रो दिनको खेलको समाप्तिमा आठ विकेटको नोक्सानीमा ४२३ रन बनाएको छ भने ३४५ रनको विशाल अग्रता पनि लिन सफल भएको छ । इंग्ल्यान्डले पहिलो दिनको खेलमा ४२ ओभर खेल्दै १२० रन बनाएको थियो भने ४२ रनको अग्रता पनि लिन सफल भएको थियो ।
इंग्ल्यान्डको तर्फबाट कप्तान जो रुटले सर्वाधिक १२१ रन बनाए । जस्प्रित बुम्राको बलमा बोल्ड हुनु अघि उनले १६५ बलको सामना गर्दै १४ चौका प्रहार गरे । रुटको टेस्टमा यो २३ औं शतक हो भने यस वर्षको छैठौं शतक हो । आजको शतक पछि रुट इंग्ल्यान्डको तर्फबाट सर्वाधिक शतक प्रहार गर्ने खेलाडीको सूचीको दोश्रो स्थानमा पुर्व कप्तान केविन पिटरसनसँग बराबरी गरेका छन् । पिटरसनको पनि २३ शतक छ भने ३३ शतकका साथ इंग्ल्यान्डको लागि टेस्टमा सर्वाधिक शतकको किर्तिमान पुर्व कप्तान एलेस्टर कुकको नाममा रहेको छ ।
रुट बाहेक इंग्ल्यान्डको लागि तेश्रो नम्बरमा ब्याटिङ गर्न आएका डाविड मलानले १२८ बलमा ७० तथा ओपनद्वय हसिब हमिद र रोरी बर्न्सले क्रमश १९५ बलमा ६८ तथा १५३ बलमा ६१ रनको योगदान दिए ।
भारतका मोहम्मद शामीले सर्वाधिक तीन विकेट लिए भने मोहम्मद सिराज र रविन्द्र जडेजाले पनि समान २-२ विकेट आफ्नो नाममा दर्ता गराए ।
यस अघि खेलमा टस जितेर पहिले ब्याटिङ गर्ने निर्णय लिएको भारतले मात्र ४० दशमलब चार ओभर खेल्दै आफ्ना सबै विकेट गुमाएर ७८ बनाएको हो ।
भारतको तर्फबाट ओपनर रोहित शर्माले सर्वाधिक १९ तथा अजिंक्य रहानेले १८ रन बनाए भने बाँकी कुनै पनि ब्याट्सम्यानले दोहोरो अंकमा रन जोड्न सकेनन् ।
ओपनर केएल राहुललाई शून्यमा गुमाएर निकै खराब सुरुवात गरेको भारतका चेतेश्वर पुजारा एक, कप्तान विराट कोहली सात, विकेट किपर ब्याट्सम्यान रिशब पन्त दुई तथा रविन्द्र जडेजा चार रनमा आउट भए । मोहम्मद शामी र जस्प्रित बुम्रा गोल्डेन डकआउट भए भने मोहम्मद सिराजले तीन रन जोड्दा इशान्त शर्मा आठ रनमा अविजित रहे ।
भारतलाई सस्तोमा रोक्ने क्रममा जेम्स एन्डरसन र क्रेग ओभरटनले समान ३-३ तथा ओली राबीनसन र साम कर्रणले समान २-२ विकेट आफ्नो नाममा दर्ता गराए । जेम्स एन्डरसनले घातक बलिङ गर्दै आठ ओभरमा पाँच मेडन ओभर सहित मात्र छ रन खर्चिएर सुरुवाती तीन विकेट लिएका हुन् भने ओभरटनले १० दशमलब चार ओभरमा १४ रन मात्र दिए ।
पाँच खेलको शृंखलामा भारत १-० ले अघि रहेको छ । पहिलो टेस्ट बराबरीमा सकिएको थियो भने दोश्रो टेस्टमा भारतले इंग्ल्यान्डलाई १५१ रनको फराकिलो अन्तरले पराजित गरेको थियो ।
