तेश्रो तथा अन्तिम एकदिवसीय खेलमा घरेलु टोली वेस्ट इन्डिज माथि छ विकेटको सहज जित निकाल्दा अष्ट्रेलियाले शृंखला माथि कब्जा जमाएको हो । पहिलो खेलमा १३३ रनको फराकिलो जित निकालेको अष्ट्रेलियाले दोश्रो खेलमा चार विकेटको हारको सामना गरे पनि अन्तिम खेलमा जित निकाल्दै शृंखला २-१ ले आफ्नो पक्ष्यमा पार्न सफल भएको हो ।
खेलमा टस जितेर पहिले ब्याटिङ गर्ने निर्णय गरेको वेस्ट इन्डिजलाई ४५ दशमलब एक ओभरमा १५२ रनमा रोकेको अष्ट्रेलियाले ११७ बल अगावै चार विकेटको नोक्सानीमा लक्ष्य पार गर्यो ।
वेस्ट इन्डिजलाई सानो योगफलमा रोक्ने क्रममा मिचेलस्टार्कले सर्वाधिक तीन विकेट हात पारे भने जश हेजलउड,एस्टन अगर र एडमजम्पाले सामना २-२ विकेट आफ्नो नाममा दर्ता गराए । अष्ट्रेलियाको जितमा म्याथ्यु वेडले अविजित रहँदै सर्वाधिक ५१ रनको पारी खेले ।
ओपनर एविन लेविसले ६६ बलको सामना गर्दै पाँच चौका र तीन छक्काको मद्दतमा सर्वाधिक ५५ रन बनाए पनि अन्य ब्याट्सम्यानले उल्लेख्य योगदान दिन नसक्दा वेस्ट इन्डिज सानो योगफलमा नै रोकिन पुग्यो ।
किफायती बलिङ गरेका हेजलउडले आठ ओभरमा १८ रन खर्चिएर भने १०-१० ओभर बलिङ गरेका जाम्पा र अगरले क्रमश २९ र ३१ रन मात्र दिए ।
अष्ट्रेलियाको जितमा वेड बाहेक कप्तान एलेक्स क्यारीले ३५, मिचेलमार्शले २९ अठाएस्टनअगरले अविजित १९ रनको योगदान दिए ।
अष्ट्रेलियाका अगर खेलको म्यान अफ द म्याच घोषित भए भने तीन खेलमा ११ विकेट हात पारेका मिचेलस्टार्क प्लेयर अफ द सिरिज चुनिए ।